17-anyos napatay, gisusi

Jeepy P. Compio

USA ka parallel investigation ang himuon sa Davao City Police Office (DCPO) human napatay ang usa ka 17-anyos nga lalaki kinsa gituohang suspek sa mga pagpanglungkab ug holdup sa area of responsibility (AOR) sa Talomo Police Station.

Kini ang gibutyag ni DCPO director Senior Supertindent Alexander Tagum human mapatay ang suspek nga si June (bansagon gitago), 17, kinsa napusilan sa usa ka Police Officer 1 alas 10:30 sa gabii, Lunes, Oktubre 9, didto sa Sandawa, S.I.R., Phase I, Barangay 76-A, dakbayan sa Davao.

"It's a public incident. And we've already initiated a parallel investigation on the said unfortunate incident," sulti ni Tagum pinaagi sa mensahe sa cellphone.

Nasayran nga dunay usa ka motorsiklo nga dunay sakay tulo ka mga lalaki ang gikan sa Calachuchi Street, Juna Subdivision ug gisundan kini sa tulo sab ka mga pulis kinsa mga miyembro sa tracker team nga nagpahigayon og motorcycle patrol.

Pag-abot sa Sandawa giingong nakorner sila sa mga pulis kinsa ang usa milukso sa motorsiklo ug gisulayan og dunggab ang usa pulis sa dala niini nga kutsilyo hinungdan nga giniyutralisa.

Nadala pa sa Southern Philippines Medical Center ang 17-anyos apan nakabsan na kini sa hinulamang kinabuhi samtang ang laing duha ka kaubanan, nakasibat atol sa pagpabuto og pusil sa pulis.

Sumala sa sketchy report sa DCPO ang napatay residente sa Kabayan Relocation Site sa Tibungco, Davao City.

Giingon nga dunay dahang kasong pagpanglungkab ang napatay nga 17-anyos sa AOR sa Talomo Police Station.