2 minero gipamusil sa Monkayo; 1 patay

MONKAYO, Compostela Valley Province - Usa ang namatay samtang laing usa ka minero ang anaa sa talandugon nga kondisyon human gipamusil.

Ang insidente nahitabo didto sa Barangay Road, Purok 1A, Barangay Upper Ulip, Monkayo, alas 12:15 sa hapon, Lunes.

Mga biktima giila nga mao si Premo D. Duga-duga, 16, minyo, nagpuyo sa Purok 1A, Barangay Upper Ulip, Monkayo ug Romeo P. Mahusay, 45, minyo, nagpuyo sa Magsaysay, Davao del Sur.

Sigun sa imbestigasyon sa kapulisan, nga ang duha ka mga biktima lulan sa Baja nga motorsiklo nga gimaneho ni Mahusay.

Ang mga biktima gikan sa Sityo Depo, Barangay Upper Ulip ug paingon sa ilang panimalay.

Apan pag-abot sa nasangpit nga lugar, duha ka wala mailhing mga suspek nga lulan sa laing motorsiklo ang mipusil sa mga biktima.

Mga suspek gihulagway nga nagsul-ob og helmet hinungdan nga walay nakaila kanila.

Nakahiagom og duha ka mga samad pinusilan sa likod sa lawas si Premo ug gidala ngadto sa Davao Regional Medical Center apan gideklarang dead on arrival sa doktor.

Samtang si Mahusay nahiagom og samad pinusilan sa likod kinsa padayong nagpaalim sulod sa ospital.

Nasayran nga mga suspek paspas nga miiktad paingon sa wala matinong direksiyon.

Narekober gikan sa dapit sa nahitaboan ang usa ka balinis sa kalibre .45 nga pistola.

Hangtud sa pagsuwat niining balita, wala pay natumbok nga suspek ang kapulisan samtang padayon pa sab ang ilang imbestigasyon.