1,615 tawo mibakwit tungod sa baha

ANG Office of the Civil Defense (OCD)-Davao nagpahimangno sa katawhan nga gilayong mobakwit ugaling magsagunson sud sa usa ka oras ang pagbunok sa ulan.

Kini ang gibutyag ni OCD-Davao spokesperson McAdrian Cubero human mokabat sa 1,615 ka mga tawo ang mibakwit sa pagbunok sa ulan nga miresulta sa mga pagbaha sa Davao City, Lunes sa gabii.

Base sa datus sa Davao City Disaster Risk Reduction Management Council (CDRRMC), natala ang 366 pamilya kun 1,615 ka mga tawo sa pagbunok sa dul-an magduha ka oras nga ulan.

Ang mga apektado nga lugar sa dakbayan mao ang Barangay Matina Aplaya, Barangay Matina Pangi ug Barangay Matina Crossing, diin ang mga mibakwit mibalik dayon sa ilang mga panimalay pag-ubos sa tubig kagahapon sa buntag.

Mitaas sab ang tubig sa Bunawan River hinungdan nga nakulgot ang dagan sa trapiko Martes sa buntag human di maagian ang tulay, apan pipila ka oras hinay-hinay nga miubos ang tubig hinungdan nga nabalik sab ang pag-agi sa mga sakyanan.

Sumala sa opisyal nga makanunayon ang pagbantay sa dagan sa panahon ug mobakwit dayon labi na ang mga namuyo daplin sa kasapaan ug anaa kilid sa mga bukid.

Kahinumdoman sa milabay nga semana, nahugno ang pader sa Bacaca Road, Barangay 19-B ug natabunan ang duha ka mga traysikol nga giparada sa dapit human mibunok ang kusog nga ulan sud sa duha ka oras.

Hinuon, ang City Social Services and Development Office gilayong nagpadala sa mobile kitchen ngadto sa mga gym nga gihimong evacuation area sa mga mibakwit.