11-anyos gilugos sa papa

Jeepy P. Compio

IPASAKA na ang kaso didto sa korte batok sa usa ka amahan nga milugos sa makadaghang higayon sa iyang 13-anyos nga anak sa Barangay Matina Aplaya, Talomo District, dakbayan sa Davao.

Kasong pagsupak sa Republic Act 8353, kun Anti-Rape Law, ug Qualified Rape by Sexual Assault, ang gipasaka batok sa amahan nga si alyas Mario.

Unod sa tulo ka pahinang resolution nga gipagula ni prosecutor Erna Orilla-Donasco nakitaan og igong hinungdan subay sa reklamo nga gipasaka sa biktima ug ang inahan sa bata.

Giingon nga niadtong Hulyo 13, ang ulahing hitabo nga gilugos ang biktima.

Nasayran sab nga niadtong nag-edad pa ang biktima og 11-anyos gipanamastamasan na siya sa iyang amahan ug gihadlok lamang ang bata nga di mosumbong sa iyang inahan.

Sa ulahing paglugos, naabtan pa sa inahan nga hubo ang tanang sapot sa biktima ug naghubo na sab ang suspek nga mikabayo sa bata.

Ang medico legal nagpagula og certificate nagpamatuod nga nahilabtan ang bata nga maoy himuong basihan aron malig-on ang reklamo.

Sa kasamtangan, balhog karon ang suspek sa selda sa Talomo Police Station samtang naghulat sa sunod mandu sa korte labot sa iyang kaso.