Nag-riot sa punerarya; mga minatay gibiyaan sa naglamay

Jeepy P. Compio

NAGKAGULYANG ang mga tawo nga nanglamay sa mga minatay sa Angel Funeral Parlor sa dalang F. Torres sa dakbayan sa Davao human gibulabog sa mga nag-riot nga batan-on alas 5 sa buntag niadtong Dominggo, Hulyo 16.

Subay sa spot report sa San Pedro Police Station, natugaw ang mga naglamay diin ang uban kanila dunay nangadyi dihang nahitabo ang kasamok sa duha ka magkalaban nga grupo sa mga batan-on.

Diha dayon, natigayon ang paglinabayay og botelya sa beer hinungdan nga natamakan ang mga buak sa bildo nga miresulta sa pagkasamad sa ka mga tawo.

Mga nangasamad mao sila Arnulfo Pal, taga Tagum City; Rommel Madarang, residente sa Barangay 39-D Poblacion; Edrey Garrido, taga Panabo City; Zaldy Nicdao, nagpuyo sa Barangay 76-A Bucana,; Florencio Jumawan Jr., taga Barangay Maa,; ug Rosalyn Anino, taga Barangay Communal, , kinsa pulos mga hamtong.

Nasikop sab ang usa ka Franz Bonghanoy, 22, security guard, taga Purok 7, Barangay 76-A Bucana kinsa maoy gituohang nagpasalba og pusil atol sa kasamok.

Nakuha sa iyang posisyon sa dinakpan ang pusil ug ang mga bala sa .45 nga pistola.

Padayon ang gihimong imbestigasyon sa San Pedro Philippine National Police aron maila pa ang ubang suspek samtang ang sekyu gibalhog karon sa selda sa San Pedro.

Hinuon mas gipahugtan pa sa tagdumala sa Angel Funeral Parlor ang seguridad sa ilang gambalay aron di na masubli ang nahitabo.