Front seats sa PUV istriktong ireserba sa PWDs, seniors

USA ka ordinansa nga nagtinguha nga himuon ang front seats sa public utility vehicle (PUV) nga permanente nga alang sa mga person with disabilities (PWDs) ug senior citizens ang giduso karon sa Davao City Council.

Si Bong Comiling, Person with Disability Affairs Office (PDAO) president, nagsulti Lunes, Hulyo 17, atol sa Kapehan sa Dabaw sa SM City Annex, Davao City, nga sila naghimo na og consultation meeting niadtong miaging semana uban si Councilor Victorio Advincula Jr. aron makabaton og hiniusang baruganan sa pagbaton og resolution aron matubag ang suliran sa mga PWDs gikan sa pagyatak sa ilang katungod sa pagbiyahe.

Siya nagtumbok sa pipila ka mga drayber nga nagbaliwala sa kasamtangan nga balaod ug ang front seats giokupa sa regular nga pasehero.

Kadtong naglingkod sa front seat di mohatag og higayon sa PWDs nga makalingkod, suma ni Comiling.

Dunay balaod ilawom sa Accessibility Law o Batas Pambansa 344 nga nagmando sa mga public transport, sama sa mga bus ug dyip nga magreserba sa lingkuranan duol sa gawasan ug sudlanan nga pultahan alang sa mga PWDs alang sa ilang akses, kaluwasan, ug maayong paglingkod.

Ug dunay posters o stickers nga ibutang sa front seats nga nag-ila sa prayoridad nga lingkuranan.

Ang malapason mobayad sa multa nga P2,000 ngadto P5,000 nga multa o pagkapriso hangtud usa ka tuig.

Kon kini maduso na, ang traffic enforcers maglusad og inspeksyon kon ang pasahero naglingkod sa atubangan PWD o senior citizen ug ang multa maghulat sa mga drayber nga di mosunod sa balaod. (Juliet C. Revita)