41 mananagat natanggong sa Indonesia miabot na

MOKABAT sa 41 ka mga mananagat nga Pinoy nga natanggong sa nasud Indonesia nangabot sa Davao City, Dominggo sa buntag, Hulyo 17.

Sakay sa Barko ng Pilipinas (BRP) Ramon Alcaraz (FF16) miabot sila sa Davao City human sa napulo ka adlaw nga coordinated border patrol kauban ang Indonesian navy.

Anaa sa napulo ang taga Davao Region, trese niini ang taga Sarangani Province, unom ang taga Zamboanga, unom ang taga Tawi-Tawi, tulo ang taga General Santos City, duha ang taga South Cotabato, ug usa ang taga Leyte.

Si Lieutenant James Reyes, spokesperson sa Naval Forces Eastern Mindanao, nagbutyag nga sakay ang mga nahisgutan sa nasampit nga barko ug midunggo sa pantalan sa Sasa.

Giingong sagad kanila ang natanggong sa Indonesia human naguba ug maanod ang ilang gisakyang bangkang-panagat gumikan sa kusog nga hapak sa mga balod.

Sa ilang pag-abot, giasikaso dayon sila sa Department of Social Welfare and Development ug City Social Services and Development Office. (Jeepy P. Compio)