Mandatory Philhealth sa tanang PWDs giduso

ANG Davao City Council nag-awhag sa mga kongresista nga nagrepresenta sa tulo ka distrito sa dakbayan nga suportahan ang mandatory Philippine Health Insurance (Philhealth) coverage sa tanang persons with disabilities (PWDs).

Ang konseho miduso sa resolution niadtong Hulyo 4 ilawom sa suspended rules aron ang mga kongresista mosuporta sa amendment sa Republic Act (RA) 7277, nailang “Magna Carta for persons with Disability.”

Base sa resolution, ang amendment maghatag og higayon sa mga dili indigent persons with disabilities nga makabaton og mandatory Philhealth coverage.

Kadtong ilawom sa mandatory coverage sa libreng health services ilawom sa RA 10606 kun National Health Insurance Act of 2013 mao ang senior citizens, indigents, ug indigent PWDs lamang.

Tungod niini, aron ang PWD makapahimulos sa libre nga serbisyo sa panglawas, kinahanglan nga mokwalipika isip indigent.

Ang implementing rules and regulations sa RA 7875 kun the National Health Insurance Act of 1995 naglatid nga ang indigents mao ang mga tawo nga way kita o ang ilang kita kuwang pa sa ilang pamilya, isip sumbanan sa Department of Social Welfare and Development base sa ispesipiko nga criteria nga gitakda sa maong katuyoan uban sa guiding principles nga gilatid sa Article I sa maong balaod.

Usa ka House Bill 5705 gititulohan, An Act providing for the mandatory Philhealth coverage of all persons with disabilities, mag-amendar sa RA 7277 giduso niadtong Mayo 29, sa Kongreso.

Niadtong Nobyembre 2014, ang Republic Act 10645 gititulohan “An Act Providing for the mandatory Philhealth Coverage for all Senior Citizens” mipalapad sa Philhealth Coverage sa senior citizens nga orihinal nga gitugotan alang sa indigent senior citizens.

Ang balaod gipirmahan ug nag-amenda sa Republic Act 9994 kun “Expanded senior citizens act of 2010” ug nagwagtang sa qualification sa senior citizens nga kinahanglan pobre sa di pa mokwalipika sa Philhealth coverage, nga gisubsidiyahan sa nasyunal nga kagamhanan. Niini, naghatag senior citizens awtomatiko sa lifetime membership sa PhilHealth. (Karina V. Cañedo)