Computer nag-over heat, 8 balay ugdaw

WALO ka mga balay ang naugdaw samtang duha ka laing balay ang nadamay sa pag-ulbo sa kalayo alas 3 sa kaadlawon, Biyernes sa Lower Madapo, Barangay 8-A, Poblacion, dakbayan sa Davao.

Si Fire Officer 1 Jovannie Ambay sa Bangoy Fire Station nagbutyag nga nagsugod ang sunog sa usa ka internetan nga gipanag-iyahan sa usa ka Josilito Cruz.

Giingong nag-over heat ang unit sa mga computer sa internetan kay 24-oras kining nag-operate nga maoy hinungdan sa pag-spark sa kuryente.

Wa pa gikabutyag ang danyos sa hitabo samtang ang mga nasunogan gilayong giabagan sa City Social Services and Development Office. (Jeepy P. Compio)