Bayot giingna'g nawong og kabayo nangulata

Jeepy P. Compio

GIBALHOG sa selda sa Sasa Police Station ang usa ka bayot human iyang giayo'g kulata ang lalaki kay giingnan siya'g mora'g nawong og kabayo.

Biyernes sa kaadlawon, miulbo ang kasuko sa usa ka alyas Erica, 19, residente sa Old Airport, Barangay Sasa, dakbayan sa Davao human siya giingnan nga mora'g nawong sa kabayo hinungdan nga iyang gikulata ang miingon kaniya nga si alyas Dave.

Giingong nag-inom ang grupo ni Erica nga pulos mga bayot sa usa ka tindahan sa dapit ug diha sab ang grupo ni Dave nga pulos mga lalaki sa pikas lamesa ug nag-inom sab.

Nasayran nga nagpadungog si Dave kang Erica nga mora kini'g nawong sa kabayo ug napun-an ang kasuko niini dihang gipaabog-abogan ang mga bayot sa grupo ni Dave pinaagi sa pagsilhig-silhig.

Wa na kaagwanta si Erica, iyang giayo'g dumog ug sumbag si Dave hinungdan nga naglisod na kini'g bangon gumikan sa kasakit sa kalawasan ug mga bun-og nga nahiagoman.

Nanawag na lang ang grupo ni Dave og Central 911 ambulance aron madala si Dave sa ospital ug gilayong miresponde ang kapulisan sa Sasa Police Station.

Temporaryong gikustodiya si Erica sa Sasa PNP samtang si Dave ug ang mga kaubanan nga nangabun-og padayong nagpatambal sa Southern Philippines Medical Center (SPMC). (Uban sa taho ni Joel Viray/dxDC RMN Davao)