Mayor, i-suspende sa ombudsman

Ivy C. Tejano

GIMANDO sa Office of the Ombudsman ang pagsuspenso og usa ka bulan sa mayor sa Northern Kabuntalan sa Maguindanao province tungod sa "simple neglect of duty".

Si Ombudsman Conchita Carpio-Morales, sa bag-ong hukom, nagkompirma nga si Mayor Datu Umbra Dilangalen angay nga manubag sa kasong "simple neglect of duty".

Kini nahitabo sa dihang ang Ombudsman nakakaplag og di magkadimao nga Statement of Assets, Liabilities and Net Worth (SALN) sa mayor alang sa tuig 2009 hangtod 2010.

Base sa imbestigasyon sa Ombudsman, si Dilangalen napakyas sa pagdeklara sa iyang 2009 SALN: ang iyang balay sa Cotabato City nga napalit sa 2000; balay sa Kabuntalan; usa ka bahin sa yuta sa Cotabato City; duha ka sakyanan nga napalit sa 2004 kantidad og P1 milyon; mga utang nga nagrepresenta sa mga loans nga naangkon gikan sa GSIS, Landbank; ug unom ka mga car loans.

Dugang niini, si Dilangalen napakyas sab sa pagdeklara sa iyang balay sa Cotabato City ug ang agricultural land sa Kapimpilan/Kabuntalan sa iyang 2010 SALN.

Matud sa Ombudsman nga ang maong kapakyasan nahimong makita sa dihang ang akusado nagdeklara sa "existence" sa samang mga propedad ug mga utang sa iyang SALN alang sa mosunod nga tuig.

Ang kapakyasan matud pa ni Dilangalen sa pagtagad sa mga detalye sa iyang SALN miresulta sa "inaccuracy" sa mga krusyal nga impormasyon niini, hinungdan nga angay siyang patubagon niini.

Sukad sa pagsuwat ning balita, wala pay gipagula nga pamahayag ang mayor bahin niini.