BIFF nangawat og baka, napatya'g 3

PIKIT, North Cotabato -- Napatyan og tulo ang mga sakop sa Bangsamoro Islamic Freedom Fighters (BIFF) nga nangawat og duha ka baka nga gipanag-iyahan sa magsuon nga sakop sa Citizen Armed Forces Geographical Unit (Cafgu).

Kini human sa nahitabong engkuwentro sa mga sakop sa Cafgu, alas 2:20 sa hapon niadtong Huwebes, Abril 20, sa probinsiya.

Mga napatay giila nga sila si Tarzan Buntasil, Kensem Dungandong ug Rusman Salik Mohammad mga sakop ni Kumander Arpie sa BIFF.

Matud ni Pikit Chief of Police Chief Inspector Donald Cabigas nga gikawat sa mga armadong lalaki ang duha ka baka sa magsuon nga sila si Ariel ug Constantino Wacan.

Hinungdan nga gilutos sa mga Cafgu, ilawom sa 38th Infantry Battalion, Philippine Army hinungdan sa nahitabong engkuwentro didto sa Sitio Valencia, Barangay Bualan, Pikit.

Milungtad og usa ka oras ang binakbakay nga maoy hinungdan sa paghikling sa mga sibilyan sa kahadlok nga maipit sa kagubot.

Daling miatras ang mga sakop sa BIFF paingon sa Liguasan Marsh tungod sa nagsingabot ang mga sakop sa 34th ug 7th Infantry Battalion.

Nakuha sa mga napatay ang duha ka M16 Armalite rifles, usa ka M1 Garand rifle ug mga buhing bala.

Samtang padayon pa ang paglutos sa militar ug Cafgu sa grupo Kumander Arpie aron nga makuha og balik ang duha ka baka nga ilang gikawat. (Edgar Fuerzas)