P10-mil binuwan insentibo sa doktor sa barangay aprubado

ANG 18th City Council nag-apruba Huwebes, Abril 20, sa memorandum of agreement (MOA) alang sa lokal nga gobyerno aron hatagan og P10-mil binuwan nga insentibo ang mga doktor sa barangay sa layo nga lugar sa dakbayan sa Davao.

Ang ordinansa nag-apruba sa pinirmahay sa MOA tali Department of Health, City Government of Davao ug barrio doctors labot sa ilang deployment sa Geographically Isolated and Disadvantaged Areas (Gidas) health facilities sa dakbayan isip kabahin sa DOH-Doctors to Barrio (DTTB) program gipalabang sa ilang proponent nga si Davao City Councilor Mary Joselle Villafuerte.

Pinaagi sa ordinansa, sila doctors Myles Clement Ababon ug Kristian Jun Lompot hatagan og P10,000 nga binuwan nga counterpart gikan sa dakbayan nga ang kantidad ihatag ngadto nila sanglit nadestino sila isip mga doktor sa barangay sukad 2015.

Ang 18th City council kagahapon, human sa deliberasyon, mitugot sa pagpasa sa ordinansa human gipaneguro ni Mayor Sara “Inday” Duterte komitado sa maong pundo alang sa maong MOA.

Si Committee on Health chair Mary Joselle Villafuerte nagseguro nga magtinabangay sila sa committee on finance alang sa alokasyon sa budget sa insentibo sa mga doktor.

Sa sesyon sa miaging semana, ang pundo alang sa MOA gikwestiyon tungod ang konseho nagkinahanglan og sertipikasyon sa kakuhaan sa pundo sanglit ang City Budget Office wa pa nakahatag tungod ang tinubdan niini gikan sa Supplemental Budget 2 (SB2) nga gitakda nga aprubahan karong Mayo.

Si Villafuerte nagkanayon nga ang probisyon lakip na SB2 gitangal apan giingon nga ang city mayor’s office maoy maghatag sa pundo.

Sila Doctors Ababon ug Lompot nagserbisyo na sa layong lugar sa dakbayan sama sa Paquibato ug Marilog district. (Karina V. Cañedo)