4 priso misulay og puga; Digos jail gihugtan og bantay

DIGOS CITY -- Gihugtan sa mga ginsakpan sa Bureau of Jail Management and Penology (BJMP) ang seguridad sa Digos City District Jail aron nga maseguro nga di makapuga ang mga binilanggo.

Nahitabo ang pagpahugot sa seguridad human misuway pagpuga ang upat ka mga binilanggo, ala 1:40 sa hapon niadtong Lunes.

Nasayran sa gipaguwang taho sa kapulisan nga samtang ang duty jail guard nga si Senior Jail 0fficer (SJO) 3 Erwin Pantujan, mihimo og superbisyon sa agianan sa mga Alternative Learning System (ALS) dihang misuway pagpuga ang mga suspek.

Gisuwayan pagpuga sa mga pinirisong sila si Joenel Arana, kinsa nag-atubang og kasong paglapas sa ilegal nga druga; Daniel Camingawan, gikasohan og murder; Joseph Maldan ug Joven Coca, pulos wa gibutyag ang mga kaso.

Sumala ni Senior Police Officer 1 Hernan Blantucas, imbestigador sa Digos City Police Office (DCPO)), ang binilanggong si Arana naghupot og mahait nga hinagiban maoy unang nanunggab kang Senior Jail Officer 3 Erwin Pantojan nga naigo sa ibabaw nga bahin sa dughan.

Daling nakapangayo og responde si Pantojan sa mga kaubanan hinungdan nga nag-warning shot dayon si Jail Officer 1 Telmoro.

Matud ni Blantucas nga gisuwayan sab ni Arana pag-atake si Arana apan abtik kining nakabantay ug napugngan ang dautang lakang niini human nga napusilan ni Pantujan ang iyang likod.

Samtang ang pinirisong si Coca misuway sa pagkatkat sa atop sa district jail, apan abtik nga nakabantay ang assistant administrative chief nga si Senior Jail Officer Eliezer Sayson ug napusilan ang suspek nga naigo sa paa.

Si Coca wa molampos sa pag-ikyas human nahagbong gikan sa rooftop sa prisohan padung sa jail perimeter fence.

Niadtong higayona, gilayong gimando ni Jail Senior Inspector Glenn Ocmen ang pagposas sa tanang piniriso nga tinun-an sa ALS ug giihap dayon ang tanang binilanggo dungan sa pagkandado sa tanang lawak sa prisohan.

Si Blantucas midason nga gidala dayon sa duol nga bay tambalanan ang mga nasamdang piniriso ug mga personahe sa district jail.

Hugot nga seguridad na ang gipatuman sud sa district jail aron di na masubli ang maong insidente. (Orlando B. Dinoy)