Guwapong estudyante gihimas sa habal-habal drayber

Jeepy P. Compio

GIPATALA sa usa ka estudyante sa kapolisan ang paghimas kaniya sa habal-habal drayber samtang nagsakay siya og motorsiklo paingon sa iyang dormitory alas 3:30 sa kadlawon niadtong Lunes, Marso 20, didto sa Barangay Bago Oshiro, Tugbok District, dakbayan sa Davao.

Si James, 18, estudyante, maoy nagpa-blotter sa Tugbok Police Station human alegasyong gihimas ang iyang paa ug mopadung na unta ang kamot sa dryaber sa iyang pribadong parte sa lawas.

“Actually, habang patakbo yung motorcycle heading towards the campus, nandyan na talaga sa legs ang kamay niya, tapos pa private part na,” sulti ni James nga nahinabi sa SuperBalita pinaagi sa telepono niadtong Lunes.

Dugang ni James, milukso nalang siya dihang ang kamot sa drayber naa na sa iyang pribadong parte sa lawas.

Giingong wala pa nakontento ang habal-habal drayber ug pugsanon pa niining gihalukan ang ulitawo apan maayo nalang kay wala naabot sa iyang ngabil.

Gisaysay sab ni James nga dalhon na unta siya sa ngitngit nga bahin sa gituohan niya nga bayot nga drayber.

Ang maong hitabo gisubay na intelligence operatives sa Tugbok Police Station.

Sa samang insidente, kahadlok karon ang gibati sa usa ka dalaga human gihimas sab ang iyang bilahan samtang nagsakay kini sa motorsiklo niadtong Dominggo sa gabii sa Barangay Matina Crossing ning dakbayan.

Si Marla, 20, maoy nagpatala sa Talomo Police Station human sa hitabo.

Nasayran nga nagmotor siya uban sa iyang boyfriend apan gisundan sila sa lalaki nga naka-motorsiklo.

Giingon nga dihang nitapad na ang motorsiklo sa lalaki kanila, kalit gihimas sa lalaki ang bilahan ni Marla hinungdan nga nasuko siya.