Drayber sa patrol car nga apil sa ambush nalubong na

BANSALAN, Davao del Sur - Gihatud na sa katapusang pahulayan ang drayber sa patrol car nga apil sa gibanhigan nga mga pulis sa mga rebeldeng New People's Army (NPA) sa Barangay Sibayan niadtong Marso 8 sa buntag.

Banda alas 12 sa udto niadtong Lunes, Marso 20, si Police Officer 2 Rolly Benelayo maoy katapusang gilubong sa upat ka mga pulis nga namatay sa ambush.

Alas 10 sa buntag gisugdan ang Santos nga Misa sud sa Immaculate Conception Parish.

Gisundan kini sa necrological service diin apil sa mihatag sa ilang testimonya si Deputy Police Provincial Director for Operations Deozar Almasa.

Gidasig ni Almasa ang nahibiling pamilya nga di luomon pag-ayo ang nahitabo sanglit kabahin sa ilang trabaho ang pagpaka-bayani pinaagi sa pagbuhis og kinabuhi alang sa nasud ug katawhang gi-alagaran.

Samtang si Bansalan Municipal Police Station Chief Adrian Antonio misaysay kon unsa ka kugihan si Benelayo sa iyang trabaho kay bisan og wa na kini duty andam gihapon kini nga moadto sa istasyon kon gikinahanglan iyang serbisyo.

Sa mga wala makaila kang Benelayo, makita sab kining mamasahero sa iyang traysikel sa panahon nga off-duty.

Sa Bansalan Cemetery, gihalad ang 21-gun salute kaniya sa mga kaubanan sa Bansalan Municipal Police Station una gitunod sa lubnganan si Benelayo.

Kahinumdoman, unang gilubong si Police Officer 2 Saro Mangotara subay sa tradisyong Islam niadtong Marso 8 sa hapon.

Niadtong Sabado, gilubong na sab si Senior Police Officer 1 Jeden Mei Rabor didto sa ilang lugar sa Mati, Davao Oriental.

Adlaw'ng Dominggo, nalubong sab si Police Officer 2 Joey Narvaza didto sa Amas, Kidapawan City.

Apan bisan nalubong na ang upat ka mga bayaning pulis, naglaum gihapon ang tagsa-tagsa nila ka pamilya nga makab-ot ang hustisya.

Grupo sa Committe Front 51 sa NPA, ilawom ni Kumander Greg ang namanhig sa kapolisan.