Diputado: Mopahuway una si Gov. Edgar Chatto

NAGKALAIN-LAIN ang reaksiyon sa mga katawhan pagkadungog nila sa balita nga gidala si Governor Edgar Chatto sa Manila kaniadtong milabay nga Domingo sa usa ka “air ambulance.”

Ngano man kaha?

Unsay hinungdan?

● ● ●

Milabay ang pipila ka mga bayloay og mga text messages, inanay nga migawas ang usa ka estorya.

Matod pa, gikarga sa usa ka air ambulance si Governor Chatto tungod sa sakit sa kasing-kasing.

Kauban niya og sakay sa maong air ambulance ang iyang asawa nga si Pureza nga maoy mayor sa Balilihan, Bohol og ang iyang anak dalaga nga si Trisha, apil na ang mga doktor og mga nurse.

Dunay nagsulti nga gipasakay sa stretcher si Governor pagsakay sa eroplano padung sa Manila.

Dili pa mahibaw-an hangtod karon kon tinuod ba ang balita nga “unconscious” si Chatto sa dihang gipasakay kini sa air ambulance.

Dili pa usab mahibaw-an kon tinuod ba usab ang balita nga nag-ingon nga gisulod sa St. Lukes Hospital sa Taguig ang gobernador sa Bohol.

Labi nang di mahibaw-an kon tinuod ba ang balita nga gisulod sa ICU si Chatto.

Dili sab mahibaw-an kon tinood ba nga na-stroke o na-cardiac arrest.

Ngano nga dili man mahibaw-an?

Tungod kay walay opisyal sa kapitolyo ang naghatag og matawag nga opisyal nga pamahayag kon unsa gyod ang tinuod.

Gani, dunay balita nga gilimod pa ang pasahero sa air ambulance nga matod pa ig-agaw kuno ni Chatto apan milutaw sa kadugayan nga si Governor Chatto og dili iyang ig-agaw ang pasahero sa air ambulance padung sa Manila kaniadtong Domingo.

Dugang pa niini, dunay balita nga mikatap nga nagpa-check up lang kuno. Isakay diay og air ambulance kon magpa-check up lang?

● ● ●

Angayan nga masayod ang katawhan sa tinuod nga kahimtang sa gobernador og dili kini ilimod sa katawhan.

Daghan ang naguol og gusto motabang pinaagi sa pag-ampo apan ang nakalisod kay dili sila kahibalo og unsay ilang pangayoon nga tabang sa Kahitas-an.

● ● ●

Kon tinuod nga gisulod sa ICU si Governor Chatto, nagpasabot lang kini nga seryoso ang hulga sa iyang panglawas.

Unsay nakaseryoso, stroke o cardiac arrest?

Sa atong nahibaw-an, kining duha ka mga sakit traydor kini sila og mokalit lang og labok nga walay pupananghid.

Kon dili makabantay ang hingtungdan, daghang komplikasyon nga mahitabo.

Buyno, manghinaot kita nga unta ipaayo og pahimutang sa Labaw nga Makakagahom si Governor Edgar Chatto.

Ngano man?

Daghan kaayo nga mga problema ang giatubang sa probinsiya karon.

Usa na niini ang resulta sa DENR test nga hugaw ang kadagatan sa Panglao.

Unsay epekto niini?

Kon mahibaw-an sa mga turista nga hugaw ang kadagatan sa Panglao og dili na luwas kaligoan, dako gyod kaayo kini og epekto sa industriya sa turismo.

Nganong kinahanglan man si Governor Chatto niini?

Tungod kay angayan nga siya mismo ang mangunay pag-imbestigar sa mga opisyales sa lungsod sa Panglao og ngano nga ilang gitugotan ang mga negosyante nga wala mosubay sa mga balaod og ordinansiya kalabot sa pagproteksiyon sa kalikopan, labi na sa kadagatan.

● ● ●

Buyno, mao kining klaseha sa mga problema ang makadugang sa sakit ni Governor Chatto.

Kon gusto kita nga makabalik dayon si Governor Chatto sa mahimsog nga panglawas, angayan lang nga mopahuway usa siya sa iyang trabaho og unahon una niya ang pagpabalik sa kalagsik sa panglawas.

Mao kini ang angayan niya nga buhaton.

Pwede ba Gov?