Mongaya: Hinaot wa mangatik ang OPAV

Anol Mongaya

SUBAY sa pamahayag sa Office of the Presidential Assistant for Visayas (OPAV), magsugod na sa pagtukod og Light Rail Transit (LRT) sa Metro Cebu sayo sunod tuig.

Matod pa sa usa ka press release gikan sa OPAV, usa ka consortium maoy mo-develop sa maong proyekto. Gilauman nga mahuman ang mga proseso diha sa Department of Transportation (DOTr) ug ang pagtukod sa LRT magsugod sunod tuig.

Ang proposal kay magtukod og usa ka elevated LRT nga dunay subway section sa central business district sa Syudad sa Sugbo.

Ako lang klaruhon nga wa akoy supak kon ipadayon ang proyekto nga Bus Rapid Transit (BRT) ug ang LRT. Makatabang man sa Sugbo ang duha ka proyekto.

Sukwahi kini sa OPAV nga naninguha nga di madayon ang BRT.

Bisan pa man, tukion gihapon nato ang LRT project nga giduso sa OPAV karon.

Kon tinuod man kini nga magsugod na sunod tuig dayon, manghinaot ko nga malakip na sa preparasyon ang mga konsultasyon labi na sa maapektado sa maong proyekto.

Pananglitan, wa bay road-widening nga angayang buhaton kay tinuod man nga gamay ang atong mga highway igo lang hinuon mobara sa trapiko ang mga dagkong haligi sa LRT kon madayon na.

Mas dakong hisgutanan mao ang pagtukod og subway sa central business district. Giisyu man gani sa oposisyon ang epekto sa subway sa eskina sa F. Llamas ug Natalio Bacalso, unsa na kaha kon magtukod og subway sa tungatunga sa Syudad sa Sugbo.

Kon mahuman gyud tuod, makahinumdom ko sa nakita nako kadtong nasaag kita sa Seoul, South Korea. Tinuod, pipila ka oras akong naglaroy-laroy ilawom sa central subway sa Seoul.

Apan yuna pa, naghisgot ba si OPAV kabahin sa feasibility study nga gihimo sa mga proponent?

Atong nahibaw-an sa miaging mga LRT proposal man gud nga mas makatabang kini sa mga nagpuyo sa ubang syudad ug lungsod sa Metro Cebu kay sa mga taga Syudad sa Sugbo gyud.

Pananglitan, mas dakong tabang sa mga taga Naga o San Fernando o bisan sa Carcar pananglit nga mag-LRT inig padung sa ilang trabaho dinhi sa Syudad sa Sugbo sa buntag ug inig pamauli sa gabii.

Apan makatabang ba kini sa mga taga Lahug nga moadto sa downtown? O sa taga Talamban nga moadto og Bulacao?

Dayon, di ba mas maayo kon magdungan ang BRT ug LRT mismo dinhi sa Metro Cebu?

Mao nga interesado ko sa feasibility study. Subo lang kay wa pa maghisgot og ingon niini nga detalye ang OPAV.

Mao kini ang hinungdan nga nakaingon ko sa akong kaugalingon nga di ba kaha atik na sab kini gikan sa OPAV.

(@anol_cebu sa Twitter)