Nalzaro: Kalbaryo ni Peter Lim

Bobby G. Nalzaro

MAGPADAYON pa kining kalbaryo nga gipas-an ni Peter Lim kay wala pa mahuman ang iyang kaso. Labi pa kay gimando-an ni Presidente Duterte ni Justice Secretary Vitaliano Aguirre III nga tutukan ang kaso, kay kon makalingkawas si Lim ug Kerwin Espinosa si Aguirre maoy ipuli sa prisohan.

Daghang kilay ang miisa niining pag-dismiss sa kasong drug trading batok ni Lim, sa self-confessed druglord Kerwin Espinosa Jr., ug uban pa sa Department of Justice. Ang panel of prosecutors mirekomendar sa pagsalindot sa kaso gumikan sa kahuyang sa mga ebedensiya.

Sa resolusyon sa DOJ panel, ang PNP-Criminal Investigation and Detection Group (CIDG) nga nag-imbestigar sa maong pasangil wala maka-presentar og igong lig-on nga ebidensiya batok ni Lim ug mga kaubanan aron kini masang-at sa husgado. Si Lim dugay na gidudahan nga nahilambigit sa illegal nga drugas. Apan wa mapamatud-i.

Sa 1990s, gi-imbestigahan siya sa House Committee on Dangerous Drugs nga gipanguluhan ni kanhi Congressman Tony Cuenco apan wala gihapon maka-rekomendar ang maong komitiba nga pasakaan siya og kaso sa hukmanan. Ang iyang mga bata-bata nga sila Ananias Dy ug Bernard Liu nga nangamatay na ubos misteryosong sirkumstansiya ang misaksi batok kang Lim.

Miulbo ang kaspa ni Presidente Duterte kinsa kumpare ni Lim. Pila ka buwan human milingkod si Duterte, mibisita si Lim kaniya didto sa Davao. Ug didto gipasidad-an siya ni Digong nga iya kining ipapatay kon mamatud-an nga nahilambigit siya sa illegal nga drugas. Apil ang usa ka Peter Lim sa listahan ni Pres. Duterte sa illegal nga drugas. Apan wala matino kon ang Peter Lim mao ba ang Sugboanong negosyante.

Daghan ang mikomentaryo nga yano lang pangdakpon ug pamatyon ang mga gagmay’ng isda apan ang mga dagko sama kang Lim, absuwelto. Aw, mao gyud na ang daling mosulod sa huna-huna sa katawhan. Pero puwede pa man i-reverse ni Secretary Aquirre ang resolusyon. Atong huwaton kon unsay sunod mahitabo.

(bobbygnalzaro@gmail.com)