Diputado: “Constructive Dismissal” ni Sereno?

BISAN sa kapiot sa panahon, mipalabang gihapon ang Committee on Suffrage sa ubos balay balaoranan sa usa ka resolusyon nga mag-oktaba sa piniliay sa SK og barangay karong bulan sa Mayo.

Ang maong resolusyon ipadala na sab nila sa plenary aron butohan kini sa tanang mga kongresista.

Buot ipasabot, taas taas pa ang proseso nga pagahimoon aron matuman gyod ang ilang gusto mahitabo.

Matod pa ni Deputy Speaker Gwen Garcia mapalabang lang kini sa labing madaling panahon kon i-certify kini sa Presidente nga urgent.

Kon dili kini himuon, hayan dili na nila ma-oktaba pa ang piniliay sa SK og barangay karong bulan sa Mayo.

Apan lisod kini mahitabo sanglit mipagawas na og baruganan ang Malakanyang nga madayon gyod ang piniliay sa SK og barangay.

● ● ●

Nagkabug-at ang problema ni Chief Justice Ma. Lourdes Sereno.

Gawas nga gikontra siya sa iyang mga kauban nga mga hurado sa Korte Suprema, gi-kontra na sab siya sa mga empleyado sa Korte Suprema.

Hasta ang mga sakop sa Philippine Judges Association mikontra na sab kaniya.

Nanawagan ang maong mga grupo nga mo-resign na lang si Sereno sa iyang katungdanan.

● ● ●

Anhi dinhi makita ang dakong kalainan ni Sereno og ni kanhi Chief Justice Renato Corona.

Si Corona gi-suportahan sa iyang mga kaubang hurado ingon man sa mga empleyado sa Korte Suprema samtang si Sereno, wala na suportahi, gikontrahan pa gyod.

● ● ●

Ang impeachment usa ka instrumento nga politikal.

Buot ipasabot, dili kini parehas sa husay sa hukmanan nga ebidensiya ang gibasehan.

Sa impeachment, ang partido nga dunay kontrol sa Senado maoy adunay kontrol sa resulta sa impeachment trial.

Karon pa lang, makita na sa katawhan nga ang mga senador nga kaalyado sa Liberal Party segurado gyod nga mobotar pabor kang Sereno.

Samtang ang mga senador nga kaalyado sa Presidente sa Senado segurado usab nga mobotar batok kang Sereno.

Kon mao gyod kini ang mahitabo, dili na ikalalis pa ang mamahimong resulta sa impeachment trial.

● ● ●

Usa ka dakong kalapasan ni Sereno mao ang iyang wala pagtuman sa lagda nga mosumiter sa iyang SALN sulod sa napulo ka tuig paatras sa adlaw sa iyang pag-apply sa Judicial and Bar Council (JBC).

Nasayod siya nga gikinahanglan kini nga buhaton aron maapil siya sa mga lista sa mi-apply sa posisyon isip Chief Justice sa Korte Suprema.

Nasayod sab siya nga kon dili niya kini masunod, dili na siya pwede maapil pa sa proseso sa pagpili sa JBC.

Karon, siya mismo miangkon nga wala niya kini matuman.

Buot ipasabot, dili na malalis pa nga kulang siya sa mga requirement aron maapil sa proseso sa JBC.

Ngano pa man gyod nga mo-insister pa man siya nga legal, husto og balido ang iyang paghupot sa posisyon isip Chief Justice sa Korte Suprema?

Nagtuo siya nga naayo ang depekto sa wala niya pagtuman sa lagda sa JBC pinaagi sa paglabay sa panahon?

Nagtuo siya nga ang maong isyo dili na angay hisgotan o hukman pa sa Korte Suprema human mo-file og quo warranto petisyon si SolGen Jose Calida?

● ● ●

Matod pa ni Cong. Gwen Garcia, nag-usab usab ang gisulti ni Sereno nga rason sa isyo sa leave of absence.

Gibalita nga misugot siya sa 15 ka adlaw nga wellness leave. Apan ang tinuod, gipugos siya sa iyang mga kaubang mahistrado nga pahimuon og “indefinite leave of absence.”

Buot ipasabot, dili kay 15 ka adlaw lang kondili walay klaro hangtod kanus-a ang iyang leave of absence.

Buot ipasabot sab, bugtong ang Korte Suprema lang ang maka-hukom kon kanus-a siya pwede nga mobalik og lingkod.

Kon dili siya pabalikon, wala siyay mahimo.

Sama ra kini sa gitawag og “constructive dismissal.”

● ● ●

Kay ubos na man si Chief Justice Ma. Lourdes Sereno sa gitawag og “constructive dismissal,” lisod na kaayo nga makabalik pa siya sa iyang pangatungdanan.

Labi na kay kontra na niya ang iyang mga kauban sa Korte Suprema, apil na ang mga huwes og mga empleyado sa Korte Suprema.