Nalzaro: Fundraising ni Junjun?

Bobby G. Nalzaro

PAGKADAGHAN sa mga pro­blema sa lalawi­gan nga angayan ha­tagan og pagtagad sa Ka­pitolyo sama sa pagpalambo sa operasyon sa mga district hospitals ug pagbukas og mga farm to market roads apan lain ang gihatagan og pagtagad sa administrasyon ni Gov. Hilario Davide III. Ipa­dayon gyud ni Gov. Davi­de ang pagtukod og 20 ka an­dana nga edipisyo diha sa Ca­­pitol compound diin nahimutang ang BAEX building.

Nakaagi ako niadtong miaging adlawa, gisugdan naman pagbungkag ang BAEX building. Ang orihinal nga design sa maong building mao nga 12 story lamang kini. Apan gihimo nga 20 story ni Junjun. Ang AS Enriquez Engineering mao ang nag-design sa edipisyo nga mokantidad ngadto sa P1.5 billion.

Mangutang pa ang Kapitolyo sa Development Bank of the Philippines (DBP) aron maoy gamiton sa pagtukod sa edipisyo. Ang unang mga floors sa building gamiton isip opisina sa nagkalain-laing buhatan sa Kapitolyo kay i-abandonar na ang main building kay i-convert kini ngadto sa heritage structure. Delikado na daw kini gamiton kay nadanyos niadtong 7.2 magnitude nga linog mga upat ka tuig na ang nakalabay. Ang ubang floors paabangan sa pribadong kompaniya.

Gi-presentar ni Davide ngadto sa mga sakop sa Hunta Probinsiyal ang plano niadtong miaging semana aron pagkonbensir sa mga board members sa pagsuporta sa iyang ambisyusong proyekto. Nagkinahanglan og suporta si Junjun sa Provincial Board labi sa pagpangaplay og loan sa bangko. Nakapangutang sab ang Kapitolyo og P200 milyones alang sa pagpalit og mga heavy equipment. Gihawsyaw pa ang bidding sa iyamg mga tawo.

Unsa ba gyud ka importante ang pagtukod ning maong edipisyo kon itandi sa ubang mga problema sa lalawigan? Kon kuyaw ang main building, nganong ila pa man nga gigamit karon? Di kaha ila lang nang rason kay na silay SOP og komisyon? Daghan ang nagduda nga gidali-dali ni Davide kini gumikan kay paagi niya sa fundraising sa umaabot nga eleksiyon? Di­li ni kurapsiyon? (bobbygnal­zaro@gmail.com)