Editoryal: Okay apan dili?

ANG paghigpit sa pagpatuman sa mga lagda sa trapiko o kadalanan sa dakbayan sa Sugbo ug Mandaue seguradong aprobado sa publiko tungod sa grabeng pag-abuso na sa ubang motorista nga hinungdan sa daghang aksidente ug nakapasamot sa kahuot sa dagan sa trapiko.

Apan, ang pagdayeg sa Traffic Enforcement Agency of Mandaue (TEAM) ug Cebu City Transportation Office (CCTO) niani usab og mga pagsaway tungod sa pag-impound sa sakyanan nga giingong dili makiangayon labi na sa mga sakyanan nga kompleto ang papelis sa pagdagan.

Mao kini hinungdan nga 'mura'g okay o aprobado' ang pag­higpit ang pagpatuman sa lagda sa trapiko apan dili maayo ang proseso sa pagpatuman niini human sa daghang reklamo gikan sa mga motorista ug sa ngalan sa patas nga panglantaw .

Matod pa, ang pagmulta og pag-isyu og citation ticket ug multa subay sa Executive Order No. 034 ni Mayor Tomas Osmeña igo nang silot sa drayber. Dili makiangayon sa sakyanan nga kompleto sa rehistro ug ubang rekisitos sa transportasyon.

Walay sala ang sakyanan nga igo lang gimaneho sa malapason nga drayber. Wala kini igong gahom sa pagsupak human walay kinabuhi ug pangutok sa tawo nga pwede mosupak kon dili ganahan sa ipahimo kaniya, kini usa ka makina.

Tungod sa kadaghan sa gipang-impound, wala na kini masulod tanan sa covered impounding area. Daghang ang nabulad sa init sa adlaw ug dayag sa uwan. Malata ang pinanggang sakyanan sa mga tag-iya niini, labi na kadtong wala pa ma-impas sa utang.

Nakasabot kita sa paningkamot sa lokal nga kagamhanan apan maayong tan-awon usab sa atong mga opisyal nga dili kini momugna og laing problema labi na ngadto sa mga motorista nga daan nang problemado sa ilang inadlaw-adlaw nga panginabuhi, hinungdan seguro nga nakalapas sa balaud. Dili mohimo og lakang nga makalibog, ‘okay nga mura’g dili.’