Niñal: Valentines sa batig nawong

Insoy Niñal

UNSAY da best nga buhaton kon wa kay uyab kay bati kag nawong? Pagtukod og grupo nga nag-promote sa katungod sa mga batig na­wong. Mao niy gibuhat sa usa ka grupo sa Japan nga gitawag og Kakuhido.

Ang akong amigo nga nagtrabaho sa Japan ang nag-istorya nako ini. Ingon siya ang Kakuhido usa ka organisasyon sa mga batig nawong sa Japan. Ha? Naa diay organisasyon sa mga batig nawong? Sa tinuoray lang, na-shock ko.

Kon hubaron sa iningles, ang Kakuhido mao ang “Revolutionary Alliance of Men that Women Find Unattractive,” ingon akong migo. “Tinuod ni?” nangutana ko. Ingon siya wa siya nagbinuang, ug gihatagan ko niyag detalye sa grupo.

Ang Kakuhido natukod niadtong 2006. Ang nagtukod ini mao si Katsuhiro Furusawa, usa ka batan-on nga nagsugod ug basa sa mga sinuwat ni Karl Marx human siya gibuwagan sa uyab kay nakakita kinig gwapo.

Si Karl Marx usa ka revolutionary sociologist sa 19th century nga nangandoy og usa ka kalibotan nga patas ang tanan, walay pobre, walay dato, walay madinaogon, walay dinaog-dinaog, labi na sa trabahoan.

Para ni Furusawa, dinhi ning kalibotan, ang mga batig nawong daog-daogon lang intawon - himoong kataw-anan, sa salida himoon lag abat, way mosugot kon manguyab.

Gitapok ni Furusawa ang mga kapareha niyag hunahuna, ug kapareha niyag dagway. Ang ilang singgit: “Kaangayan Alang sa Mga Batig Na­wong sa Kalibotan.”

Kon ang kang Karl Marx “Workers of the World, Unite!” ang kang Furusawa “Ugly People of the World, Unite!” Tuyo nila nga lumpagon ang Ka­pitalismo, sama sa gibuhat ni Marx. Pero ning-focus si Furusawa sa iyang gitawag nga Kapitalismo sa Gugma.

Kanang roses ug chocolates nga imong gipalit para’s imong uyab, love capitalism na. Lipay kaayo mo apan wa mo masayod nga hapit na lang way gikaon ang mga nagtanom sa maong mga buwak kay barato ra kaayo ang baligya ini. Daot na kaayo sila, namyahok nang aping, bati na kaayog nawong, mas gwapa pa ang mga buwak nga ilang gitanom.

Sa miaging Valentine’s Day, ang mga membro sa Kakuhido nag-rally sa kadalanan sa Japan. Kon Binisay-on ilang singgit mao ni: “Unda­ngon ang Valentine’s Day,” “Ang Pag-Gakos-Gakos ug Pag-Kiss-Kiss sa Publiko Terorismo.”

Di makaangayon nang mag-­public display of affection kay masakitan ang mga batig na­wong, ingon sila.

Ug kalit lang naabli akong mga mata sa kamatuoran. May katungod pud diay ming mga batig nawong. Ug diha-diha nakadesidir ko nga magtukod ko og Kakuhido chapter sa Cebu.

Pagkadako tingali sa among chapter. Pagkadaghan kaha sa membro. Amo kining tawgon og “Panaghugpong sa Mga Batig Nawong sa Sugbo.” Ug ako ang presidente. Kahilakon kong naghunahuna.