Nalzaro: Reklamo sa mga CPDRC inmates

Bobby G. Nalzaro

ANIA kitay nadawat nga suwat gikan sa mga binilanggo sa Cebu Provincial Detention and Rehabilitation Center (CPDRC).

‘Sir Bob, mangayo unta kami ug tabang kon unsa ang angay namong buhaton kabahin ining pagpangabuso sa mga pulis ug PDEA kon mag-greyhound operation.

Sa pagkatinuod Sir Bob, maulaw kami magpatabang nimo tungod lagi kay kami piniriso ra. Apan kon magpadayon kami magpakahilum sa ilang dili maayong binuhatan kami maoy labaw nga makaluluoy hangtod kanus-a sila matagbaw sa pagpahimulos na­mo.

‘Kini sila wala gyuy kaluoy diri kanamo. Tinuod, mga piniriso man kami, hugaw og makasasala man tan-awon sa mga tawo tungod lagi sa among tagsa-tagsa ka mga kaso nga gi-atubang. Apan sa tinuod dili kami tanan tinud-anay nga sad-an. Tawo ra usab kami nga adunay katungod nga dili nila yatakan. Kami nga sa among pagtuo tarong diri sa sulod sa tinuod lang malipay mi bisan kada adlaw pa mag-greyhound o searching diri sa among prisohan.’

‘Apan kung mao nalang pod na mag-greyhound aron lang sila makakwarta sa hinago-an namong mga piniriso, aw, mas labaw pa silang makasasala kay namo. Nangyawat gani kami lihok diri sulod sa prisohan aron makadawat lang 300-500 pesos nga allowance kada bulan gikan ani among kooperatiba sa sulod aron among mapadala sa among pamilya apilon pa nila ug panguha. Ang among mali­bogan Sir Bob, bisan pa gani ang halin sa among canteen diri sa sulod ilaha pa panguha-on sa among atubangan kay kuno kontrabando. Ilaha kuno kuhaon kay i-surrender didto sa Governor’s office. Apan among nahibal-an gikan sa ba­lita sa radyo ug tv, ang kwarta nga ilaha nakuha gamay raman kaayo ang ideklarar.’

‘Pareho atong ilaha ng greyhound niadtong bulan sa Agosto 2017. Sir, ilang nakuha ato gikan sulod sa canteen hapit o dul-an P300,000. Apan ang ilang gideklarar sa media kay P18,000 ra. Gani naa may usa ka prison guard nga assigned sa admin office nga in-charge sa rehabilitation nahibalo kay matod niya nahibalo na ang gobernador. (Aduna kini part 2 ugma.) (bobbygnalzaro@gmail.com)