Lariosa: Kinsay kasab-an ni Duterte?

Ernesto Lariosa

GIKUYAWAN ang ka­tawhan karon sa pahibawo sa National Food Authority (NFA) nga nagnihit na ang bugas humay sa nasod. Kay kon tipunon ang bugas sa NFA, commercial rice ug ang anaa sa mga panimalay mohangtod na lang sa 75 ka mga adlaw.

Kini epekto sa pag-disapprove sa NFA Council sa tinguha nga makapalit og 250,000 metric tons nga humay gawas sa nasod. Ang katarungan daghan pang commercial rice ug masaaron ang atong panguma.

Kay nahadlok sa nahitabo nga kakuwang, giaprubahan dayon sa Council ang importation. Apan uwahi na, suma pa ni Administrator Jason Aquino 40 ka adlaw ang dagan una moabot ang impor­ted rice.

Kini kay ipaagi pag bidding ug ang pagkarga sa humay ug paglawig sa barko mogugol kapin sa 3 ka semana kana kon way kakulian sama sa bad weather ug kanihit sa mga barko.

Maingon-ingon nga takdo ra gayud ang pundo ug ang pag-abot unya sa humay gikan sa gawas. Kini ra bang commercial supply volatile ang statistics kay panaguan sa mga traders.

Ang konsumo sa tibuok nasod mokabat ngadto sa 629, 260 ka mga sako. Sa rehiyon 7 o Central Visayas adunay 34,860 ka mga sako ug ang NFA supply duna lay 139,000 bags sa rehiyon.

Sa ato pa, di kaabot og 5 ka adlaw batok konsumo ang pundo sa ahensiya way labot ang komersyal rice ug ang pundo sa mga panimalay. This holds true in other regions of the country.

Husto nga wa na mobaligya ang NFA sa mga retailer kay gawas sa mga buotan iduso dayon ni nila sa mga trader aron makaganansiyag dako ning higayon nga nagnihit ang humay.

Unta mosalig si Pamuno Duterte sa NFA nga maoy eksperto sa rice inventory forecasting di sa iyang food advisers nga mga palpak. Tiamo na diyutay hinuon siya madiskaril.

Angay ning kasab-an ang nagtambag niya nga di motuo sa NFA. Daghan man gud ang nagtuo nga may nangurakot sa rice importaiton. Kon akoy Duterte hands on siya ning maong kalihukan aron way makasapi.