Barrita: Deadline sa war on drugs

Eddie O. Barrita

ADUNAY bag-ong deadline sa gubat kontra sa illegal nga drugas. Si Presidente Rody Duterte namahayag nga hayan magkinahanglan pa siyag dugang usa ka tuig aron sa pagsumpo sa illegal nga drugas.

“Basta sabi ko sa droga, I hope to finish the problem, maybe, just give me another year,” nagkanayon ang pangulo.

Sa ato pa usa ka tuig na lang ang paabuton ug mapapas na ang suliran sa drugas. Kay mao kini ang iyang gikabalak-an nga moguba sa atong kabataan nga maoy kaugmaon sa atong yutang natawhan.

● ● ●

Sa iyang kampanya sa pagka­­presidente, iyang gisitar ang deadline nga tulo ngadto sa u­­­nom ka buwan sa pagsumpo sa problema sa ilegal nga drugas.

Apan iya kining gilugwayan hangtod sa katapusan sa iyang unom ka tuig nga termino. Matod pa niya iyang na-underestimate ang kagrabe sa suliran sa illegal nga drugas.

Pero matod pas taga Cabadiangan, si Presidente Duterte ray nakabungkag sa balay sa hulmigas. Tiaw ba nang kapin sa usa ka milyon ka mga adik ug tigpayuhot sa illegal nga drugas ang mi-surrender.

● ● ●

Gimando na sa presidente ang pagpabalik sa Philippine National Police (PNP) sa gubat kontra sa illegal nga drugas.

Ang lead agency mao man un­­ta ang Philippine Drug Enforcement Agency (PDEA). Apan kuwang ang personnel sa PDEA.

Ang PNP adunay kapin sa 17,000 ka uniformed ug non-uniformed personnel samtang ang PDEA aduna lay 1,700 ka mga ahente sa tibuok nasod.

● ● ●

Ang reklamo mao nga mahimong duguon ang gubat kontra druga ubos sa PNP. Daghan sab ang di motuo nga kadtong napatay nisukol sa kapulisan.

Mao nga gipasiatab sa PDEA nga usa ra ka drug suspect ang napatay sa ilang anti-drug operation samtang sila mao ang lead agency.

Apan di na tagdon sa pangulo ang mga pagsaway sa mga human rights groups. "It is a non-issue to me and I will not answer it anymore,” matod pa niya.