Espinoza: LTFRB unfair!

Elias L. Espinoza

BIAS. Di ni paglaban sa Angkas nga gipaundang sa LTFRB kay matod pa walay permiso gikan sa kagamhanan. Ang Angkas usa ra ang pasareho di sama sa habal-habal nga mokarga og tulo ngadto sa upat ka pasahero.

Mao ni ang di nato masabtan sa LTFRB. Imbes nga tabangan ang usa ka negosyo sama sa Angkas nga mahimo nga legal paundangon na hinuon. Sa nagbaga nga trapiko kada adlaw, nakatabang og dako ang Angkas sa mga nagdali.

Si Commissioner Aileen Lizada niadtong miaging semana morag James Bond. Mi-text sa Angkas unya misakay apan pag-abot sa unahan gidakop. Giluod ko nagtan-aw sa TV news. Di salaod sa trapiko ang sayop. Wa kunoy business permit gikan sa local government ang Angkas.

Na­nakop ba ang LTFRB sa mga habal-habal nga mas delikado kay mokarga og daghan pasahero? Ang mga pulis ug traffic enforcer wa man gani manakop sa habal-habal, LTFRB pa kaha?

Ang mga commissioner sa LTFRB labina na si Lizada nagpakita lang sa ilang pagka backward. Ang Angkas naghatag sa mga pasahero og katungod sa pagpili sa masakyan, labina kadtong nagdali.

Di ko motuo nga ang mga LTFRB commissioner, labina ni Lizada, nga sa kataas sa ilang kaalam, wa makahibawo nga dugay na nga nagdagan sa Bangkok, Brazil, China, Cambodia, ug uban pa nga nasud ang transportasyon sama sa Angkas. Ilang gitawag ni nga motorcycle taxi.

Kahibawo ba mo nga didto sa Goa, India, ang ngan sa driver sa ilang motorcycle taxi pilot? Ang motorcycle taxi maoy pinakabarato ug paspas nga transportasyon niani nga mga dapit.

Sa Bangkok makahibawo ta nga motorcycle taxi ang nagdagan kon ang driver nagsul-ob og orange vest ug helmet unya usa ra ang pasahero. Mao ni ang gibuhat sa Angkas. Nagsul-ob og helmet ug may uniporme ang driver ug ang pasahero ilang pasul-ubon og helmet.

Wa tay makita nga kasaypanan sa lagda sa trapiko sa mga Angkas nga nagdagan. Ang habal-habal daghan og salaod sa trapiko. Moparking bisan asa ug ibabag pa sa dalan ang ilang motorsiklo. Kadaghanan sa habal-habal driver di mag­helmet ug mokarga og daghan nga pasahero.

Wa mosugot si Cebu City Ma­yor Tomas Osmeña nga ang city traffic enforcers maoy mo­ban­tay sa Angkas. Dinhing dapi­ta uyon ko sa pagsupak ni Mayor Tomas nga ang traffic enforcer sa dakbayan maoy manakop.

Daghan ang way trabaho ka­ron nga panahon tungod kay kuwang ang matrabahoan nga kumpaniya. Ang Angkas naka­hatag og pangitaan sa mga tawo nga way trabaho apan dunay lisensya sa pagmaneho og sakyanan sama sa motorsiklo.

Ang LTFRB ug ang local government mao unta ang mangita og paagi nga makalisensya ang Angkas aron usab maangay ang pletehan.