Nadela: Bahala ug hinay basta kanunay

Junrey Nadela

NISULAY ko og sakay kauban ang akong cameraman ug mini bus sa may South Road Properties (SRP) pagtino sa mga pasangil nga kusog mopadagan ang mga driver sa maong dapit.Sa sulod sa mini bus daghan ko og nahinabi nga pasahero apil na ang dri­­ver nga si Vidal Sanicon.

Matod ni Vidal nga ang disgrasya kabahin na sa kinabuhi nilang mga driver. Sa pangutana kung angayan ba nga magtamod ang mga driver sa 60 kilometro matag takna nga gikusgon sa dagan lain lain ang panahom sa mga pasahero.

Naglabi ang niingon nga angayan lang gyud paglikay sa disgrasya. Apan duna sa’y niingon nga di ni mahimo kay dugay moabot sa ilang distinasyon. Samtang nagsige ko og interview kalit lang nga ni-overtake ang laing bus. Mao to nga nikomentaryo ang usa ka pasahero nga kadtong ni-overtake nisubra na sa 60kph kay tulin kaayong niarangkada ug takulahaw lang nawala sa among panan-aw.

Sobra gyud tinuod sa 60kph kay mao ra man ni ang gikusgon sa dagan ni Vidal. Pulong pa sab sa among driver nga nagsunod ni Vidal mga 80 ang gikusgon sa maong bus. Mao nga nakaingon ko nga sakto ang mga traffic managers sa ilang tinguha nga makabaton ug speed gun kung hugot nga pagpatuman sa 60kph diha sa SRP ug South Coastal Road ang himoon.

Komentaryo

Naminaw ko sa komentaryo sa ubang pasahero nga di lang speed limit ang tutukan sa maong karsada. Usa sa hinungdan sa disgrasya mao ang ubang driver nga magpataka lang og overtake nagsalig sa kalapad sa karsada. Kabantay mo anang mo-overtake nga di mogamit sa iyang signal light nga mobalhin na siya og lane.

Dia pay lain. Gipasanginlan sab nila kining mga sakyanan nga hinay kaayo ang dagan apan tua sa lane nagsubay nga para sa kusog. Ug ang mga motorsiklo nga magpataka lang og padagan. Ang pait kay magsige og balhin og lane.

Pun-an pa sa mga trisikad nga namasahero. Mao ni labad sa ulo sa mga traffic managers diha sa Talisay City. Ang mga trisikad way kahadlok nga madaro simbako sa mga dagkong sakyanan sanglit naa naman gyud sila magsubay sa karsada. Pabor kadtong naa namasahero sa sidewalk kung paatubang sa usa ka distinasyon habig sa eskina sa San Isidro.

Si Lolot Tulda kanhi nag-alagad sa Land Transportation Office karon kaabag na ni Almond dela Peña sa pagduma sa trapik sa Talisay City nitug-an nako nga tukma nga panahon nalang gikinahanglan paghawan sa maong karsada batok sa mga trisikad ug mga kolorum nga tricycle nga nagsige ug bahas bahas didto.

Ang lain nakong ika sulti Lot, himoon nato nga ehemplo ang Talisay kung trapiko ang hisgutan. Maisip baya nato ning maong siyudad nga bintana o ganghaan sa mga dagkong patigayon ug uban pa sa Metro Cebu area.