Rabacal: Pinurdoy na hubad sa survey

Manny Rabacal

ANG Social Weather Stations (SWS) survey, nga gihimo niadtong Sept. 23-27, 2017- nagpakita nga 67% sa mga Filipino ang natagbaw sa gihimo ni Presidente Rodrigo Duterte, samtang 19% ang wa matagbaw ug 14% ang wa pa makadesisyon. Sa mao gihapon nga survey, ang trust kon misalig sa presidente miabut og 73%, 12% ang minus og pagsalig samtang 15% ang wa pa maka-desisyon.

Itandi kini sa survey niadtong Hunyo, ang gross satisfaction rating ni Duterte miabut og 78%. Ang misalig sa presidente miabot og 73%.

Kon atong ikumparar ang tanan nga natagbaw sa gihimo sa presidente karong bag-o (67%) itandi sa survey niadtong Hunyo (78%) miminus kini og 11%. Sa misalig kang Duterte niining bag-ong survey (73%) itandi niadtong Hunyo (73%) way pagka-usab.

Sa akong pinurdoy nga pangagpas ang nanaug nga rating mao lamang ang sa gross sa­tisfaction rating ug wala ang gross trust rating. Daghang wa makasabut nganong mominus ang kinatibu-ang natagbaw ug misalig kang Duterte tungod lang kay misaka ang porciento sa mga wa matagbaw ug wa misalig sa presidente.

Sayud hinuon ang mga ma­alamun nga mao kini ang paagi sa pagbasa sa survey result apan naglibug niini ang mga purdoy.

Kini ang gitawag nila og net trust and performance ratings.

● ● ●

Usa ka dinakpan ang gipusil patay sa barangay tanod sa Ermita, Cebu City. Nagkabuang og pangatarungan ang tanod nga gitumbok nga maoy mipusil sa biktima.

Alang kanako way lusot ang suspetsadong tanod tungod kay gidili man alang kanila ang pagdala og pusil. Ambut og pila kaha ka barangay ta­nod ang ang magbitbit og armas panahon sa ilang pag-ro­ving sa gabii.

Gidid-an usab ang mga barangay sa paghimo og detention cell tungod kay kinahanglang ila dayong itugyan ang ilang dinakpan ngadto sa labing duol nga police station. Apan nganong anaa man niini ang Barangay Ermita?

Anaay mga pagduda nga ang mga dinakpan sa mga tanod ibalhug usa sa barangay detention cell aron magsabut silag areglo.

Daghang mga tanod nga mga but-an apan maduhig lang sila niining pipila lamang ka mga badlungon.

(msr1144@yahoo.com)