Nalzaro: Maghudyaka ang mga durugista

Bobby G. Nalzaro

MIPAGAWAS ang Ma­lakanyang og orden ehekutibo nga naghukas na usab sa Philippine National Police (PNP), Armed Forces of the Philippines (AFP) ubang mga law enforcement agencies apil na ang National Bureau of Investigation (NBI), Bureau of Customs, Postal Services Office sa anti-drug operations. Ubos sa executive order, ang Philippine Drug Enforcement Agency (PDEA) lang ang adunay gahum sa pagpahigayon og anti-drug operations.

Ikaduha na kining kamanduan nga gipagawas ni President Rodrigo Duterte human sa daghang reklamo batok sa kapulisan sa ilang anti-drug operations nga daghan ang kaso sa extra judicial killings. Mga napulo ka buwan ang nakalabay mipagawas og susamang kamanduan ang Presidente.

Makapaabot kita nga mas mogara ang mga tawo nga nahilambigit sa illegal nga drugas gumikan kay wala na may maggukod kanila. Ang kapulisan ug NBI di na makapahigayon og operasyon. Makadakop lang sila kon maaktuhan nga nagdala o nagsuyop og drugas ang usa ka suspek. Apan di na sila nakapahigayon og buy bust operation ug mga pagpangronda.

Ang mahitabo niini, dili na mahatagan og dinaliang aksiyon ang gagmay’ng mga street pushers o mga users kay ang unahon sa taga PDEA mao na ang mga dagkong isda sama sa mga drug lord o kanang high value targets. Gamay lang ang mga personnel sa PDEA ug natural dili nila makaya ang pagsikop sa mga nahilambigit sa illegal nga drugas sa ilang area of responsibility.

Sama dinhi sa region 7, aduna lay 50 ka mga personnel ang PDEA 7. Unya puwer­ting dakoa sa region 7.

Magpista, maghudyaka ug magmaya ang mga durugista niini. Dili na mahadlok kay wala na may gahom ang PNP paggukod kanila. Matod pa ni PNP chief Ronald “Bato” Dela Rosa nga “hayahay” na pod ang mga pulis kay makaginhawa na sila. Mao nay gi-ingon nga hayahay pa sa pulis sa Siquijor.

Ambot og nganong mao kini ang nakab-ot nga desisyon sa Presidente. Tinuod, adunay mga kaso sa abuso o extra judicial killings. Apan imo bang i-sakrispisyo ang kaugmaon sa tibuok nasud gumikan kay adunay mga abuso? Mosaka og balik ang problema sa drugas ani.