Barrita: Ni-resign na, gi-impeach pa

Eddie O. Barrita

GI-IMPEACH sa House of Representatives si Commission on Elections (Comelec) Chairman Andres Bautista sa boto nga 137-75-2 pipila ka oras human niya ipahibawo niadtong Miyerkules nga moluwat siya sa katungdanan karong Disyembre 31 ning tuiga.

Ang bugtong tumong sa impeachment mao ang pagpalagpot sa usa ka impeahable official gikan sa iyang puwesto.

Makaingon kita nga si Bautista ni-resign na, gi-impeach pa. Unsaon nga sa 31 pa man sab sa Disyembre mo-epekto ang iyang resignation.

● ● ●

Sa unahan, gisalindot sa House justice committee ang impeachment complaint batok ni Bautista tungod kay depektuso ang verification form niini. Apan gilintuwad sa plenary ang hukom sa maong komitiba.

Busa ang maong komitiba gimanduan ni Deputy Speaker Raneo Abu sa pag-andam sa articles of impeachment ug sa pagduso nini ngadto sa Senado nga maoy mobista sa kaso isip usa ka impeachment court.

Sa maong bista mayagyag ang mga akusasyon batok ni Bautista nga naglakip sa ill-gotten wealth nga giingong mo­kabat sa usa ka bilyon ka pesos.

● ● ●

Way mahimo ang Senado ubos sa balaod gawas sa pagbista sa impeachment case batok ni Bautista.

Apan makapahimuot kon atong palandungon nga ang maong kaso batok sa usa ka opisyal nga buot ipalagpot sa katungdanan, niluwat na sa puwesto.

Pero lagi sa tapos pa sa tuig moepekto ang iyang resignation. Kon niingon pa siya nga diha-diha dayon ang iyang resignation, di na unta siya ma-impeach.

● ● ●

Daghan ang nidayeg ni Bau­tista sa iyang pagluwat sa katungdanan sama nila ni Senador Panfilo Lacson ug Frankkin Drilon.

Kinaiya sa mga opisyales sa gobyerno nga kon labhan sa mga akusasyon nga moingon nga probahon una kini ug diha pa sila manaog sa puwesto.

Lahi ang nahitabo kang Bautista. Ni-resign na, gi-impeach pa.