Barrita: Kagawasan, demokrasya

Eddie O. Barrita

ANG mga butang nga atong naandan hayan nga ato na lang nga ibaliwa. Sama sa hangin nga atong gihanggap ug giginhawa. Unsa man ang mahitabo kanato kon kalit kining mawala?

Mao kana nga atong hisgutan matag karon ug unya ang mahitungod sa atong demokrasya ug kagawasan nga karon atong natagamtam. Duna bay kalainan kining duha?

Sumala pa ni Marvin Simkin, “Democracy is not freedom. Democracy is two wolves and a lamb voting on what to eat for lunch. Freedom comes from the recognition of certain rights which may not be taken, not even by a 99% vote”

Ang demokrasya maingon nato nga rule by majority. Kinsa ang mayoriya mao ang modaog. Mao kana nga dunay supermajority ang administrasyon sa Kongreso. Samtang morag see-saw ang pagkontrolar sa konseho sa syudad sa Sugbo tali sa Barug Team Rama ni kanhi mayor Mike Rama ug sa Bando Osmena Pundok Kauswagan ni Mayor Tomas Osmeña.

Gipakita usab ang demokrasya sa atong pagpili og mga representante sa Kongreso. Kini tungod kay kuti man nga konsultahon ang tanang katawhan sa matag higayon nga magpanday og mga balaod.

Mao nga usahay ang rule by majority nahimo nang rule by minority. Kini tungod kay ang kapin sa usa ka gatos ka milyon ka mga Pilipino nisalig man sa 292 la ka mga kongresista ug 24 ka mga senador.

Ang atong kagawasan gipakita sa atong Batakang Balaod nga naglatid sa atong mga katungod nga angay pagatamdon sa tanang higayon. Angay natong hinumdoman nga ang Batakang Balaod wa magha­tag kanatog mga katungod - nigarantiya kini sa atong mga katungod.

Usa na niini ang ang haligi sa usa ka gawasnong gobyerno. Matod pa ni Benjamin Franklin, “Freedom of speech is a principal pillar of a free government; when this support is taken away, the constitution of a free society is dissolved, and tyranny is erected on its ruins.”

(edbarrita@gmail.com)