Diputado: Fake news nasad

HASKANG liboga sa akong kutaw.

Gi-imbestigar sa senado ang gitawag og “fake news.”

Pasabot peke nga balita.

Apan naunsang pagka-unsaa nga bahin na man hinuon og opinyon – og dili peke nga balita - ang ilang gituki og gihisgotan.

● ● ●

Sa akong sabot, gitawag siya og “fake news” kay dili siya tinuod nga balita o pangilad lang nga balita.

Pananglitan, gitagawtaw ni Overall Deputy Ombudsman Arthur Carandang nga sumala sa rekords sa Anti-Money Laundering Council (AMLC), mokabat sa bilyon ka pesos ang mga transaksiyones sa pamilya Duterte.

Apan gipanghimakak kini sa AMLC.

Matod pa sa AMLC, wala sila mopagawas o mohatag og rekord ngadto ni Senador Antonio Trillanes o sa opisina sa Ombudsman mahitungod sa mga deposito sa bangko sa pamilya Duterte.

Alang kanako, matawag kini og “fake news” kay dili man tinuod nga balita ang gitagawtaw ni Carandang.

Namatud-an man kini nga bakak og pangilad lang sa dihang mipagawas og “certification” ang AMLC nga dili tinuod ang gitagawtaw ni Carandang.

● ● ●

Apan sa hearing sa senado sa miaging semana, dili balita ang ilang gihisgotan kondili ang blog o opinyon ni Mocha Uson og sa Thinking Pinoy.

Naunsang pagka-unsaa.

Nangutana si Senador Bam Aquino ni Uson kon sa pagsulat niya sa iyang mga blog o opinyon, iya ba nga gihatagn og higayon ang iyang mga giatake nga mohatag sa ilang panig sa estorya.

Mitubag si Uson nga dili siya journalist kon dili blogger lang siya.

Ang buot ipasabot ni Uson, dili balita ang iyang gisulat kon dili opinyon lang niya.

Kon balita pa ang iyang gisulat, angayan hatagan og kahigayonan ang hingtungdan sa pagtubag o pagpadangat sa iyang panig sa estorya.

● ● ●

Ang pagpadayag sa opinyon o hunahuna usa ka tawhanong katungod nga gigahin sa atong batakang balaod.

Ang katawhan adunay ka­tungod nga mopagawas sa ilang hunahuna o opinyon sa tanang butang nga duna siyay kalambigitan, sama sa pang-gobierno o kahiwian sa mga opisyales sa gobierno.

Buot ipasabot, mahimo nga sumsuman ang tanang mga gisulti o gihimo sa mga opisyales sa gobierno basta aduna kini kalambigitan sa ilang trabaho o kanang gitawag og official acts or conducts.

Mahimong sayop o dili husto ang opinyon o hunahuna sa usa ka tawo apan gitugot kini sanglit apil man kini sa gahom sa pagpadayag sa hunahuna sa usa ka gobierno nga demokrasya.

● ● ●

Sa samang paagi, adunay katungod ang mga katawhan sa pagbasa o pagpaminaw sa ilang gusto basahon o paminawon.

Kon dili ako uyon sa opinyon sa usa ka tawo o wala ako mo­angay sa iyang paagi sa pagsulat o wala ako mosalig sa iyang katakos sa pagsulat, dili nako usikan akong oras kaniya.

Akong katungod kon mobasa o maminaw ba ako og walay si bisan kinsa nga magbuot kanako kon ako kining buhaton.

● ● ●

Ngano man nga na-isyo man ang mga blog o opinyon ni Mocha Uson?

Simple lang kaayo ang tubag.

Tungod kay adunay sobra sa 5 ka milyones ka mga tawo ang nagsunod o nagbasa sa iyang mga blog o opinyon.

Buot ipasabot, ingon usab niana kadaghan ang mga katawhan nga miangay o miuyon o kaha, nagsunod sa iyang sinulat nga mga huna-huna.

Buot usab ipasabot, kon pipila lang ka tawo ang nagsunod kaniya, segurado ako nga dili gyod na siya tagdon o tawgon sa senado.

Labi nang di gyod unta na siya banatan og pangutana ni Bam Aquino.

● ● ●

Mao kini angayan buhaton ni Bam Aquino og sa ubang mga tawo nga parehas og hunahuna ni Bam Aquino.

Kon wala sila mouyon sa gisulti ni Mocha Uson, dili sila mobasa sa iyang blog.

Kon nagtuo sila nga di kasaligan o tumotumo o propaganda lang ang gisulti ni Uson, ang angay nila buhaton, dili sila mobasa sa iyang blog.

Segurado ko nga dili magsakit ang ilang kutokuto kon ila kining buhaton.

Apan kon mobasa man gani, unya dili sila mouyon sa iyang mga hunahuna, angayan nga ilang pasagdan si Uson kay iya pod nang katungod ang pagpadayag sa iyang hunahuna.

Kay kon buot hunahunaon, wala may nagpugong kanila sa paghimo sa susama sa gibuhat ni Uson.

Duna silay Facebook account, sayon ra kaayo ang pagsundog sa gihimo ni Uson nga magsulat og blog.

Bahala na og si Senador Bam Aquino lang og ang iyang mga staff ang mobasa sa iyong gisulat.

Ang punto dinhi, kitang tanan dunay katungod sa pagpahungaw sa atong gibati o hunahuna, bahala og husto o sayop ba kini alang sa uban.

Ang importante lang natong hinumdoman, dili kita makalapas sa personal o tawhanon nga mga katungod sa atong isig ka ingon.

Amen.