Nalzaro: Minarunong sa BOPK

Bobby G. Nalzaro

NAGMINARUNONG ang Bando Osmeña Pundok Kauswagan (BOPK) kabahin aning paghulip sa puwesto nga gibiyaan ni resigned councilor Hanz Abella. Si Abella miluwat sa katungdanan human siya gitudlo ni Presidente Rodrigo Duterte isip commissioner sa 7th National Labor Relations Commission (NLRC).

Ang BOPK mi-sekreto pagpadala sa ilang endorsement ni kanhi Vice President Jejomar Binay, kinsa chairman sa United Nationalist Alliance (UNA) diin nahisakop si Hanz isip sakop sa lokal nga Team Rama. Apan human mideklarar og independente, nitapon si Hanz sa BOPK.

Ubos sa Section 45 sa Local Government Code ang partido diin nahisakop ang konsihal nga mi-resign maoy mo-nominate sa mohulip niya sa Office of the President pinaagi sa Executive Secretary. Pirmahan kini sa chairman sa partido. Ug kay Team Rama/UNA man si Hanz, ang overall chairman sa maong partido ang mo-nominate.

Apan ang taga BOPK misekreto diay og rekomendar sa ngalan ni Rengelle Pelayo, kanhi presidente sa Cebu City Sangguniang Kabataan nga matod pa loyal sa mga magti-ayong Osmeña.

Ambot og nganong sa ka­daghan sa mga maayong laki sa pulitika nga anaa sa BOPK, si Pelayo man ang ilang nahuna-hunaan. Hinuon, nahimong ex-officio member sa konseho si Pelayo isip SK federation president.

Wala uroy ma-uwaw ang taga BOPK sa paghimo sa maong lakang bisan kon nasayod kon unsa ang mandatu sa balaod. Ang ilang rason kay ang taga Team Rama gawas ni kanhi mayor Mike Rama namalhin na ngadto sa partido sa admi­nistrasyon, PDP-Laban. Unya si Hanz sakop na kuno sa BOPK busa sila ang adunay katungod nga morekomendar sa mohulip.

Gigamit sa BOPK si Senador Manny Pacquiao nga suod nga higala ni Binay pamasin nga makombensi ni Manny si Binay ug ang rekomendasyon sa BOPK maoy i-nominate ni Binay.

Minarunong ang gihimo sa taga BOPK. Bisan dili abogado makamao mohubad sa balaod. Nagtuo siguro sila nga malipat nila ang katawhan.

(bobbygnalzaro@gmail.com)