Rabacal: Unsay gikahadlukan sa PNP?

Manny Rabacal

DILI na mopakita ang mga sakop sa Philippine National Police (PNP) sa mga spot report ug case folder nga kaniadto ordinaryo kaayong mabasa ni bisan kinsang media reporter. Mao kini ang unod sa sa text message gikan sa Camp Crame.

Angay masayran nga kining spot report, case folder ug uban pa, mga public records. Dili usab angay mahadlok ang mga pulis sa mga tinuoray nga sakop sa media kay mga responsible sila.

Nagtuo ako nga resulta kini sa media report nga nagtumbok sa kapolisan nga sad-an sa pagpatay kang Kian delos Santos ug sa ubang mga batan-on sa Luzon.

Daw dili ako makatuo nga adunay pagtugot ni Presidente Duterte kining maong kasugoan kay dilisiya gusto nga pugngan ang media ug katawhan sa pagkuha og impormasyon kalabut sa mga pulitiko, nagtrabaho sa gobiyerno ug mga government project.

Sa dihang milingkod siya sa pagka-presidente, ang Freedom of Information bill nga dugay kaayong nahimong balaud iyang gi-shorcut ang katumanan niini pinaagi sa executive order alang sa government offices and personnel hangtud nga nahimo kining balaud.

Unsa may buot itago sa PNP? Pilion ba lang nila ang mga report nga ilang ihatag ngadto sa media ug taguan ang mga impormasyon nga makadaut kanila?

Daku kining tamparus ngadto sa mga sakop sa media nga nagsaulog sa “Cebu Broadcaster’s Month” ug sa “Press Freedom Week.” Gipasigarbo sa Cebu media nga panahon sa martial law ang mga sakop lamang sa media sa Sugbo ang wala mahadlok nga misulti sa tinuod nga paghitabo bisan sa hulga nga sila isud sa stockade. Karon, hain na man ang freedom of the press dinhi sa Sugbo?

Kinahanglang maghiusa ki­ta, mga sakop sa media ug katawhan nga mahigugmaong masayud sa tinuod nga impormasyon, pinaagi sa pagpaabut kang PNP Chief Bato dela Rosa ug kang Pres. Duterte nga unta ibalik nila ang paghatag og spot report ug uban kasayuran ngadto sa media aron kini masayran sa publiko.

Away

Nag-away na ang mga higante sa pulitika. Una ang pag­tinubagay nila ni Sen. Richard Gordon ug Sen. Antonio Trillanes IV. Miresulta kini sa pagpasaka ni Gordon og ethics complaint batok kang Trillanes.

Tungod sa pamahayag ni Trillanes nga si Davao City Vice Mayor Paolo “Polong” Duterte sakop sa Chinese Triad tungod kay wala kini mosugot nga ipakita ang iyang patik sa likud, napikon si Pres. Duterte. Napun-an pa kini sa pasangil sa senador nga adunay minilyon nga bank deposit ang bise mayor.

Mibawos ang presidente sa pagpasangil nga si Trillanes adunay bank deposit sa daghang overseas banks. Bisan og mihimog waiver ang senador aron kuno matan-aw sa Anti-Money Laundering Council (AMLC) ang iyang mga deposit, apan miinsister si Duterte nga tinuod ang iyang gikuptang mga ebedensiya.

Mipahibawo usab si Polong nga iyang ipakita ang patik sa iyang likud, nga buot tan-awon ni Trillanes, sa umaabut nga mga adlaw. Abangan.

(msr1144@yahoo.com)