Barrita: Spot report

Eddie O. Barrita

NILUWAT og kamanduan ang Camp Crame, ang headquarters sa Philippine National Police, nga nagdili sa mga tigbalita sa pagbasa sa spot report.

Ang spot report naglangkob sa tanang mga panghitabo gikan sa nagkalain-laing mga police units ngadto sa ilang headquarters. Naglakip kini sa mga sensitibong impormasyon ug nga intelligence reports, verified man o dili.

Ambot lang kon gilakip ba sa maong mando ang pagdili sa pagbasa sa mga tigbalita sa police blotter nga maoy talaan sa tanang reklamo ug mga krimen nga gisang-at ngadto sa kapulisan.

● ● ●

Kaniadto sa police reporter pa ko maglisod kog basa sa police blotter panahon sa kagabhion kay gihimo man kining unlan sa imbestigador.

Mao kana nga sa usa ka forum sa mga imbestidaor sa kapulisan, ako silang gipanguta kon ila ba gihapong unlanan ang police blotter.

Nalipay ko sa ilang tubag nga di na nila unlanan ang police blotter. Di na maglisod ang mga reporter. Akong gipangutana kon ngano, ang ilang tubag mao nga magdala na silag unlan.

● ● ●

Gisupak kining maong kamanduan sa mga tigbalita dinhi sa Sugbo ug sa ubang mga dapit. Unsa may gitaguan sa kapulisan?Ang sagad ug angay nga taguan ang wrong spelling ra sa blotter.

Mao kana ang hinungdan sa pasiaw nga tungod kay nag­lisod ang imbestigador sa spelling sa knife, small bolo na lang ang gisuwat.

Apan nipasalig si Chief Supt Jose Mario Espino, hepe sa Police Regional Office 7, nga wa silay impormasyon nga pug­ngan ngadto sa mga tigbalita bisan pa sa kamandoan gikan sa Camp Crame.