Editoryal: Katungod sa media

HUMAN putli ang Commission on Human Rights (CHR) og access sa mga kaso sa mga sakop sa Philippine National Police (PNP), gidid-an na usab karon ni Police Director General Ronald dela Rosa ang mga police officials sa paghatag og spot reports ngadto sa mga sakop sa media.

Buot ipasabot nga wala na unyay balita nga mapaabot ang mga media ngadto sa publiko kon unsay nahitabo sa mga ope­rations sa atong mga tinugyanan sa balaod.
Sa spot report man gud mailhan ang agency nga nag-operate, ang pangalan sa mga sakop niini ug ingon man ang aktuwal nga panghitabo atol sa operation. Kini maoy mahimong unod sa balita sa mga media.

Karon nga dili na ang mga media makahupot niini, unsaon na man pagkahibawo sa mga tawo kon unsa gyuy tinud-anay nga nahitabo atol sa operation?

Kini maoy mga pangutana nga lisod na unya tubagon tungod lagi kay wala na may spot report nga mausisa ang mga tigbalita.

Ning paagiha, mawala na unya ang transparency ug ingon man ang accountability sa police operations kay dili na man mautingkay sa mga media ang tinud-anay nga inpormasyon.

Kon sa nangaging mga adlaw atong namatikdan nga adunay mga abusadong pulis nga misakay niining hugot nga kampanya sa administrasyon batok sa gidiling drugas, unsa pa kaha karon nga daw sa gitapin-an ug gihapnigan na sila daan og agianan aron sayon malikayan ang pasangil?

Mahinumdom kita, nga ubos sa panahon sa Martial Law ni Presidente Ferdinand Marcos, ang mga media maoy unang gihikawan sa katungod ug kagawasan aron matabunan ang mga pag-abuso sa militar ug sa mga tinugyanan sa balaod.

Hinaot nga dili kini maoy sinugdanan ug unta dili kini maoy atong mapuntariyahan o maabtan. Atong iampo.