Lariosa: 'Ber' month na!

Ernesto Lariosa

KAKUSOG sa lupad sa panahon! Daw kagahapon pa lang ang atong pagsaulog sa bag-ong tuig sa 2017 sa tungang gabii sa miaging Disyembre 31. Tulo ka mga buwan na lang ang gilay-on sa 2018.

Duha ang hikab-hikab nga nagbangsiwa nga miuyog sa dughan sa katawhang Filipino: ang nagkurog nga kalaay sa pagpaabot sa katapusan sa gubat sa Marawi ug ang kahinam sa pagsaulog na sad sa Pasko.

Ber month na ug tulo na ka mga buwan nga misatong ang gubat sa Marawi. Nagpasabot ba kini sa kahuyang gyud sa atong armadong kusog labi na sa Army? Nag-usik-usik lang sa mga bomba nga usahay mangunay.

Husto gyud si Duterte nga makigsandurot na lang a China kay sa makigbatok niini bisag nangilog na sa atong mga isla sa Spratley. Kangilngig sa armadong kusog sa China, mag-ayo ta?

Maayo na lang nga mag-upoy-upoy sa daplin Kay sa mobarog aron ingnong maisog sa paglaban sa katungod.--- pagpatunhay sa atong soberanya. Tinuod, bayanihon ang paglaban sa yutang natawhan,way molalis.

Kana kon patiran na gyud ta sa China. Apan kini hinayhinay man nga miduol nato aron sad sa pakighigala. Gani nagpatuo kini nga ang suliran angayng sulbaron sa mga maayong pamaagi.

Ang ber month nagbunlot sad sa atong kahinam pag­hanggap sa hangin nga nagsapwang sa kahumot sa umaabot nga Pasko. Kini tungod sa mga Paskuhanong awit ug huni nga gipatugtog nga naghinay-hinay paghikap sa Filipino Psyche.

Sayon ra tang pahumkan aron molugwa ang atong tinigom ug mangumpra dayon sa mga mall ug agkong mga department store nga nakaayo sa negusyo aron makakuwarta pag-ayo ang mga kapitalista.

Kay kini ang mahitabo dayon. Inigsud sa ber month i-condition dayon ang atong pangisip sa mga giswid sa Pasko. Ang pobreng Juan dela Cruz nga di makapugong mamalit dayon paghurot sa tinigom.

Ang atong angayng buhaton mao ta ang pagpugong. Adto ra magbungga sa Pasko gyud. Apan kon gikinahanglan kay Christmas season motunol ta ngadto sa nagkinahanglan aron malipay Siya!