Diputado: Ang “satanic rosary”

DAKONG lalis ang namugna tungod sa giingon nga “satanic rosary.”

Matod pa, ang “satanic rosary” usa ka klase sa rosaryohan nga dunay simbolo sa adlaw sa ibabaw nga bahin og bitin nga naglikos bisan kon dunay simbolo sa patay nga lawas ni Hesukristo sa tunga nga bahin niini.

Ang adlaw og ang bitin timailhan kuno kini ni satanas.

Ang pag-gamit sa rosaryohan gidili sa simbahang katoliko kay sama sa giampoan sa nag-gamit sa rosaryohan si satanas og dili si Hesukristo.

• • •

Holding na pod ni, matod pa sa usa ka katoliko.

Ngano man?

Matod pa niya, ang rosaryohan usa ka medium o instrumento sa atong pag-ampo ni Mama Mary.

Klase-klase ang rosaryohan, matod pa niya.

Dunay mahalon, dunay baratohon, dunay dagko, dunay gagmay; dunay nindot, duna poy di nindot.

Ang importante sa rosaryohan, dunay krus og dunay 55 ka mga lugas nga maoy basehan sa gidaghanon sa “our father,” “hail mary” og “glory be to the father,” dugang pa niya.

Gunitan lang sa kamot ang rosaryohan samtang mag-rosaryo tungod kay memoryado na man ang mga misteryo og mga “our father” og “hail mary” samtang gipiyong ang mga mata.

Di man ka maka-focus sa pangadye og magbuka imong mata, matod pa niya.

• • •

Ang giingon nga “satanic rosary” dunay simbolo sa namatay nga hesukristo nga nagdupa.

Ang naka-deperensiya lang kay imbes “inri” ang naa sa ibabaw, gipulihan kini og adlaw samtang dunay bitin o halas nga naglikos sa ubos.

Mao kini hinungdan nga gitawag kini og “satanic rosary.”

Duna siyay mga pangutana.

Tungod lang kay nawala ang “inri” og dunay simbolo sa adlaw, satanic na diay?

Duna man gihapon ang simbolo sa patay nga lawas ni hesukristo sa maong rosaryohan. Naa sab ang krus. Buot ipasabot, mas importante ang “inri” kay sa simbolo sa patay nga lawas ni hesukristo?

• • •

Duna pay dugang mga pangutana.

Kon gamiton ang maong “satanic rosary” sa pag-rosaryo, nausab ba diay ang imong giampoan nga si Mama Mary man gihapon og dili man si satanas, dugang pa niya.

Mao man gani kini hinungdan nga kasagaran nga magpiyong ang mata sa mag-rosaryo sanglit nag-ampo man siya ni Mama Mary.

Duna man gani mag-rosaryo nga gamit og ring nga rosaryohan. Duna pod mag-rosaryo nga gamit ang bracelet nga rosaryohan.

Duna pod uban mag-rosaryo nga gamit lang ang mga tudlo sa kamot kay na-memorya na ang rosaryo.

Apan walay taga-simbahan nga mireklamo kay pag-ampo man gihapon kini gamit ang rosaryo.

• • •

Duna ba diay kausaban sa atong pagtuo tungod lang kay wa na dinha ang litra nga “inri” sa rosaryohan, pangutana niya.

Nasayod man ang mga gumagamit og rosaryohan og para unsa ang rosaryohan, dugang pa niya.

Bisan pa og unsaon pag-porma ang rosaryohan, parehas ra gihapon ang tumong sa mogamit, mag-ampo ni Mama Mary, panapos niya.

OA ra pod nang uban nga mireklamo ana, matod niya.

• • •

Dunay daghan angay buhaton ang simbahang katoliko gawas sa pagbatikos sa gitawag og “satanic rosary.”

Angayan ayohon ang kanta sa simbahan nga mosibo sa husto nga pagtuo.

Parehas sa pag-ampo sa “Amahan namo” nga sumpayan og “nga anaa ka sa mga langit” nga ang English ana unta kay “who art in heaven” man unta. Nganong “mga langit” man?

Duna pay lain.

“Og dili mo kami itugyan sa mga panulay” maoy litokon sa binisaya nga unta sa English pa, mao man kini ang gilitok “do not bring us to the test.”

Ang angay unta ani kay “og dili mo kami itugyan sa pagsulay” dili kay panulay.

Amen.

• • •

“I will destroy him or he will destroy me,” mao kini ang gibuhiang pulong ni PRRD tungod sa padayon nga atake ni Senador Trillanes batok kaniya og sa mga sakop sa iyang pamilya.

Alang kanako, dili na kini kinahanglan.

Og matuman lang ang kagustuhan ni Senador Gordon, gusto niya palagpoton sa senado si Trillanes.

Kon mouyon ang ubang mga kaubanan ni Gordon, hayan mapalagpot gyod si Trillanes.

Kon dili na siya senador, mawagtang na sab ang iyang naandan nga mga patutsada nga makalagot sa kadaghanan.