Nalzaro: Idili na ang high heels

Bobby G. Nalzaro

GUMIKAN sa hangyo sa Trade Union Congress of the Philippines (TUCP), ang Department of Labor and Employment (Dole) mimando sa mga tag-iya og mga shopping malls nga dili nila pugson ang ilang nga sales ladies nga mosul-ob og mga high heels. Kay matod pa dili lalim kining mag-sul-ob og high heels unya kanunay magtindog.

Tinuod bitaw, tan-aw nako dili lalim ning mga babaye nga magsul-ob ning maong matang sa sapatos. Dili maka-relax ang imong mga tiil labina ang mga kuyamoy. Unya maayo unta og makalingkod ka. Apan nasayod naman kita nga dili maglingkod ang mga sales ladies ug pabarugon gyud sila kay aron maka-entertain sa mga kustomer.

Ang mga sales ladies maoy usa sa mga under paid nga mga empliyado labi pa kanang mga shopping malls nga gipanag-iya og mga negosyanteng Intsik. Wala magsunod sa minimum wage ang management unya dose oras pa ang serbisyo. Dili walo ra ka oras. Barikuson na gud nang uban diha gumikan sa pagtinindog.

Dili lang ang mga sales ladies kon dili apil usab nang mga empliyado nga naa sa front desk sa mga hotels, guest relations officers ug mga cosmetics models. Sila man gyud ang mga frontline niining maong matang sa mga negosyo. Maayo unta bisan naka-high heels sila basta palingkuron lang. Di man pod puwedeng molingkod.

Laing tan-awon pod unta sa Dole mao kining kahimtang sa mga security guards nga gihatagan og multi-tasking nga trabaho sa mga kompaniya. Unsaon man nila pag-guwardiya sa ilang gi-alagaran kon gisugo o gitahasan sila og laing trabaho sa management? Ang uban gihimong janitor ug tigpalit og pagkaon. Inig sulod sa tulisan, walay guwardiya kay gisugo og laing. Ang guwardiya tigbantay ra gyud.

(bobbygnalzaro@gmail.com)