Nadela: Ang trapik sa Natalio

Junrey Nadela

NAGSINARDINAS. Ingon niini ang akong pag­hulagway sa ka­­himtang sa mga sakyanan sa dalan Natalio Bacalso niadtong Agusto 8 adlaw nga Martes.

Kini resulta sa pagsira sa usa ka dakong bahin sa maong karsada nunut sa pagsugod na sa pagtrabaho sa underpass. Sa mga wa pa makasuroy karong bag-o sa maong dapit mao ni ang eskina Batalio Bacalso Avenue ug F. Llamas St. nga nahimutang sa Barangay Basak, San Nicolas sa dakbayan sa Sugbo. Ang eskina ni sa nahimutangan kaniadto sa dakong pabrika nga Rubberworld nga karon gipulihan sa dakong tindahan ug giatbangan pa gyud ug laing dakong tindahan. Tungod kay eskina natural ang kaniadto mingaw kaayo nga mga dalan karon puwerte na nga ka-busy busa nanginahanglan na og minilyon ka pesos aron matukoran og underpass.

Ang underpass maoy solusyon sa matag adlaw nga kalanrakas sa mga sakyanan nga moresulta usahay sa ka-late sa trabaho ug eskwela. Kay sugdan naman sa pagtrabaho mao nga gisirad-an ang usa ka lane ug sa gipaabot nang daan nagsinardinas ang mga sakyanan.

Pero pagka Miyerkules ubos sa rekomendasyon ni Councilor Dave Tumulak nasulbad ang problema human gimando pagdili sa mga bus , mini bus ug ubang six wheeler truck pataas pag-agi sa maong dapit. Sa South Road Propertues na sila gipaagi.

Ang sulti sa mga PUJ dri­ver mas maayo pa ang kahimtang sa trapiko karon itandi niadtong panahon nga wa pa tak-upi ang maong karsada. Sa akong pagsabot ang mga dagkong sakyanan maoy nag-unang hinungdan nganong trapik kaayo ang maong dapit. Gani sa pag-agi nako sa nakalabayng gabii hamugaway na kaayo itandi sa nangaging mga gabii. Di kaha ang gibuhat ni Kobsehal Tumulak makapa ukay ug ibalik sa isyu kung panahon na ba nga ibalhin ang South Bus Terminal palayo sa city proper? Atong atngan.