Nalzaro: Walay pakabana sa drugas

Bobby G. Nalzaro

NIADTONG miaging semana, namahayag ang "kanhi laos nga pulitiko" nga mamahimo lang siyang aktibo siya sa kampaniya batok sa illegal nga drugas kon ibalik sa mga kadagkuan sa PNP ang iyang mga police commanders sa Cebu City Police Office ug ingon man sa Regional Police Office (PRO 7).

"Give me my police chiefs," matod pa niya. Iyang gidemanda ang pagpabalik ni S/Supt. Benjamin Santos isip CCPO director ug Chief Supt. Patrocinio Commendador isip PRO 7 regional director.

Ingon niya nga kon mahibalik ang maong mga PNP officers mo-aktibo na siya sa kampanya batok sa illegal nga drugas. Kini human gibutyag ni President Rodrigo Duterte nga migrabe karon ang problema sa drugas dinhi sa rehiyon ug sa dakbayan sa Sugbo. Gitumbok sa Presidente nga "hot spot" sa drugas ang Kabisay-an.

Matod pa sa "kanhi laos nga pulitiko" nga iyang i-activate ang Barangay Intelligence Network (BIN) ug hatagan ug igong suporta ang kapulisan. Kay ngano man diay karon nga si S/Supt. Joel Doria ang CCPO director, wala diay siya kusganong mosuporta sa kapulisan sa kampanya niini batok sa illegal nga drugas? Maayo man ang performance ni Doria. Unsa man goy record atong Santos nga makadyot ra man to madestino dinhi?

Sa kaso sa hepe sa PRO 7, dili siya angayang mo-demand kay wala na kini sa iyang hurisdikyon. Bisan ang mga gobernador nga labaw pa niya og gahum dili maka-demanda kay regional level na kini. Kagahapon, gihulipan naman gani si Chief Supt. Noli Talino ni Chief Supt. Jose Mario Espino. Ambot ug unsay hinungdan sa paghulip ni Talino nga unta mag-usa ka tuig pa man siya human madestino dinhi. Promotion ba niya ngadto sa Camp Crame o ba kaha gumikan kay naghitak gihapon ang il­legal nga drugas dinhi?

Buot ba ipasabot niining "kanhi laos nga pulitiko" wala siya magpakabana sa illegal nga drugas kay dili iya ang mga police chiefs. Mao diay hinungdan nga naghitak ang drugas. O toa siya nakapusta sa pikas sama ni kanhi mayor Mike Rama ang gitumbok sa Presidente nga "drug protector." (bobby@sunstar.com.ph)