Mongaya: Protesta sa Piston

Anol Mongaya

ATONG naagi-an ang rali kagahapon sa Piston batok sa pag-phaseout sa mga PUJ. Ila sab nga gibatokan ang proyekto nga Bus Rapid Transit kun BRT.

Alang sa Piston, diin kining ilang protesta tipik lang sa usa ka nasudnong panawagan batok sa PUJ phaseout, wa molantaw sa interes sa mga kabus nga mga drayber.

Nahimo kining nasudnong isyu kay lagi ang maong PUJ phaseout apil man sa gimando sa bag-ong balaod kabahin sa franchising.

Gamay na lang gani silag kita, pagastuhon pa sila alang niining gitawag og e-jeep nga moabot og minilyon.

Samtang tuyo nato nga ma­moderno ang atong transpor­tasyon, di sab tingale nato isa­kri­­pisyo dayon ang mga drayber.

BRT

Kabahin sa BRT, nahingawa ang mga drayber og PUJ kay la­­­kip sa BRT project mao man sab ang pag-phaseout sa mga PUJ.

Di gyud noon total phase-out kay, sa akong nasabtan kabahin sa BRT, gikinahanglan man ang mga PUJ sa mga secondary routes.

Karon, sa Maghisgot Kitag Politika, Bay, dunay nagsigi og pangutana kon unsa lagi kining mga secondary streets?

Alang kanako, ang mga secondary street ug ruta mao kining dili maagi-an sa BRT. Buot ipasabot, lakip gihapon sa mga magi-an sa PUJ ang dalan C. Pa­dilla, Colon, V. Rama, P. del Ro­sario, MJ Cuenco, ug uban pa.

Usa sa mga speaker sa rali sa Piston kagahapon mao ang usa ka urban poor leader nga nangutana nganong duna pay relokasyon ang mga maigo nga kahoy kay sa mga kabus nga maigo sa road widening.

Sakto ang akong higalang si Jesse Bacon nga niingon nga ang kalamposan sa BRT nag-agad kon giunsa kini pagsulbad ang ingon niini nga mga soci-economic issues.

Ug nalipay ko nga nasugdan na ang proseso agi sa dialog sa mga sakop sa Piston kagaha­pon ug si Mayor Tomas Osmena.

Sayop

Samtang nagsud-ong ko sa mga nagprotesta, nahimuot ko naghunahuna nga simang ra kaayo ang mga isyu nga giisa sa mga anti-BRT sama niadtong giingong eksperto nga si Rene Santiago.

Alang kang Santiago, ang mga isyu kontra sa BRT mao ang kagamay sa mga dalan sa Sugbo ug mosamot kahuot ang dagan sa trapiko kay mag-ilog na lang kuno ang ubang mga sakyanan lakip na ang PUJ sa mga lane nga gikawatan sa BRT lanes.

Wa niya giapil sa iyang pagkwenta ang pagpalapad sa dalan ug ang pagbalhin sa ruta sa mga PUJ.

Kining mga isyu nga giisa karon sa Piston mao pa ang mga tukmang mga isyu nga angayang hisgutan karon.

(@anol_cebu sa Twitter)