Espinoza: Mobabag sa pagmoderno

Elias L. Espinoza

BRT. Ako na ning gi­su­wat ug gisulti ma­kadaghan nga ang una nga moreklamo sa BRT nga proyekto ni Cebu City Mayor Tommy Osmeña mao ang mga drayber ug ope­rator sa PUJ nga maapektohan sa rota sa BRT.

Kagahapon nagwelga ang pundok sa Piston apan naay biyahe ang mga PUJ. Maayo tawon kay nakaamgo ning Piston nga ang mananakay ang mapuwersyo sa transport strike ug dili ang ahensya sa gobyerno nga ilang giprotestahan.

Dili sa ingon nga di ko uyon sa BRT, apan sa atong sitwasyon dinhi nga gamay og mga dalan mosamot unya ang problema sa trapiko. Maayo unta ang BRT o mass transport kay mahipos ang mga abusado nga PUJ drayber sa dalan.

Natural nga moreklamo ang mga PUJ drayber kay sila ang mawad-an og trabaho. Apan di unta problema kon ang BRT project ni Mayor Tomas dunay probisyon nga maha­tagan og trabaho ang mga PUJ drayber nga maapektohan sa rota sa BRT.

Abi ninyo, ang problema sa atong public transport usa ra ang mabasol; ang di maayo nga sistema sa transportasyon sa atong panggamhanan. Kay kon ang gobyerno pa ang nagpadagan sa transportasyon wa untay gubot.

Tan-awa ang Melbourne, Australia hapsay ang ilang sistema tungod kay sa pagsugod ang gobyerno maoy nagpadagan sa bus ug train. Gawas nga barato ang pletehan ug permanente ang biyahe, walay transport strike.

Hinuon di pa uwahi ang tanan alang sa mass transport dinhi sa dakbayan.

Apan maproblema ang ka­gamhanan tungod sa walhon nga mga organisasyon nga nagpaluyo sa mga PUJ operator ug drayber nga mobabag sa modernisasyon sa atong transportasyon.

Sa miaging semana, gianunsyo ni LTFRB 7 Regional Director Ahmid Cuizon nga naaprobahan sa miaging buwan ang Omnibus Franchising Guidelines nga nagmando nga bag-ohon na ang mga sakyanan nga depasaheroan.

Tungod niini, ang pundok sa Piston nagsugod og protesta gahapon sa Manila ug Cebu as ilang pagsupak sa moder­nisasyon. Ang gusto diay ning pundok sa Piston nga padaganon gihapon ang mga kuraol nga PUJ.

Intawon oi mga “Pistonero” milabay na sa ta millennium angayan nga mokuyog na sab mo sa dagan panahon. Kanus-a pa man diay ninyo pulihan nga mga 20 anyos na nga diesel nga PUJ nga itom na kaayo ang aso?

Ato ba ni sabton nga wa mo maglantaw sa atong kalikasan ug kaayohan sa ta­nan kay ang inyo rang gusto ang matuman? Pagmata na mo oi!