Nalzaro: Away trapiko miresulta sa pagpamusil

Bobby G. Nalzaro

HANGTOD pagtagik nato ning maong lindog, wala pa mopatim-aw o motahan ngadto sa mga awtoridad si David Lim Jr., kinsa gitumbok nga mipusil sa usa ka lalaking nurse niadtong Domingo sa kadlawon diha F. Sotto st., likod sa simbahan sa Iglesia ni Kristo gumikan lang sa lalis sa trapiko. Si Lim, anak sa usa ka inilang magpapatigayon nga si David Lim Sr., maoy gitumbok nga mipusil kang Ephraim Montalbo Nunal, 33, empleyado sa University of Cebu Medical Center.

Naglalis ang duha human hapit sila magkabangga gumikan kay nag-ikis-ikis ang sakyanan ni Lim nga Mercedes Benz ug mibabag sa kalsada. Mibusina si Nunal kang Lim apan nasuko si Lim. Nanaog ang duha sa ilang mga sakyanan ug nagkomprontasi. Gisumbag ni Lim si Nunal apan nakalikay kini. Wala pa makontento, mibalik si Lim sa iyang sakyanan ug mikuha og armas dayon pusil ngadto ni Nunal sa makadaghang higayon.

Naigo si Nunal makaduha sa iyang bitiis apan wala dayon kini malup-og gumikan kay kalibre .22 ra man ang gigamit ni Lim. Misibat dayon si Lim kuyog sa iyang kaubang babaye nga na-ilhan nga si Tamae Takahashi, usa ka Filipino-Japanese national. Adunay usa ka motorista nga nakakuha og video sa panghitabo pinaagi sa cellular phone.

Matod pa ni Nunal nga hubog si Lim niadtong tungura gumikan kay klaro kaayo sa iyang dagway. Wala dayon mailhi si Lim. Apan human mikatap ang video sa maong insidente sa social media, daghan na ang miila kaniya. Gi-post dayon ang iyang hulagway sa social media nga nakabarong siya diin mitambong og usa ka party nianang gabii sa wala pa mahitabo ang insidente.

Kini gitawag og Road Rage, away lang sa trapiko nga misangpot sa pagpamusil. Daghan ang mga hitabo nga ingon niini. Kini gumikan kay ang uban dili makapugong sa ilang kaugalingon kay aduna man usay mga driver nga mga abusado. Unya naka-inom ug nagdala og armas, aw, maoy gyuy sangputanan. Dili angayan unta nga magpadala sa kasuko gumikan lang sa away sa trapiko. Wala ba kaha magmahay si Lim sa iyang gihimo noh?

(bobby@sunstar.com.ph)