Mongaya: Ayaw padala sa tama

Anol Mongaya

DI man unta mahitabo kadtong giingong “road rage shooting” sa dalan F. Sotto, Cebu City sa miaging Dominggo sa kaadlawon kon wala pa nagpadala sa tama ang drayber nga namusil.

Dako ang posibilidad nga nakainom kini ug nag-away sa uyab nga sakay sa awtong iyang gimaneho.

Maoy akong pangagpas nga nahitabo mao to nga giingong naghunonghunong ang awto diha sa tunga sa dalan.

Makahinumdom man gud ko kaniadtong batan-on pa ug makainom dayon mag-away sa uyab? Nakasuway mo ana nga sitwasyon? Di ba lami kaayo ipanghagis?

Mao nga tambag nako dili lang sa mga batan-on sa ingon niining sitwasyon, ayaw padala sa tama. Samot pa karon nga panahon na sa mga camera phones ug dashboard cams.

ATM

Lain sab nato nga bantayan mao kining ATM skimming diin kawaton diha mismo sa ATM ang atong hinagoan nga tinigom sa bangko.

Daghan ang nabiktima niini lakip pa ang akong higala nga si retiradong huwes Menmen Paredes ug pipila ka mga opisyal sa kapulisan.

Maayo na lang kay nasakpan sa NBI ang tulo ka mga Romanian national tungod kay na­kita man ilang mga na­wong ug ang awtong gisakyan sa CCTV diha sa ATM.

Apan ang pangutana karon, di ba kaha kini sila tipik sa usa ka mas dakong sindikato sa mga ATM skimmers?

Naglaom kita nga matugkad kini sa NBI.

Sa pagkakaron, naa kining kabalaka nga basin duna nay nangawat sa atong gideposit nga pundo sa banko.

Sa akong bahin, mas moga­mit ko sa mga ATM nga naa tungod sa bangko o kanang naa sa mga mall kay binantayan og mga security guard.

Molikay ko anang mga ATM nga naa sa mga uwa-aw nga dapit kay di man gud makit-an kon dunay nagkuri-kuri sa maong machine aron makawat ang atong pin number.

Dunay mga istorya nga atong nadunggan nga gi-holdup human ni withdraw sa mga ATM nga naa sa mga mingaw nga dapit.

Pari

Sakto ba kining mokuyog ang usa ka pari sa operasyong Tokhang sa kapulisan? Duha ka semana nga miagi, atong nahinabi ang usa ka pari ug napunta kini sa pasi-aw nga igo na lang unya nga tigbendita sila sa mamatay sa maong mga police operations.

Apan, lahi sab kining kasinatian sa usa ka parish priest diha sa Pasil kay gigamit sab niya ang pagkuyog sa Tokhang aron makumbinser ang mga adik ug pusher nga mag-usab na.

Ang ako lang masulti niini lisud kay kinahanglan kang modesisyon kon unsay sakto. (@anol_cebu sa Twitter)