Espinoza: Midako ang isyu

Elias L. Espinoza

BASLANAY. Kon mobasa ta sa mga mantalaan ug maninaw sa balita sa television mora og gubot pas lukot ang sitwasyon sa atong panggamhanan.

Human mopasaka og impeachment complaint si Magdalo Party-List Rep. Alejano batok ni Presidente Duterte sa giingon nga krimen batok sa katawhan tungod sa patay sa mga gituhoan nga dorugista, pasakaan usab si Bise Pres. Leni Robredo og impeachment complaint.

Ang gibasihan sa impeachment complaint batok ni Robredo mao ang iyang gipadala nga video sa iyang reklamo didto sa United Nations sa giingon nga “lipat ulo” kabahin sa kampanya sa pulis batok sa ilegal nga drugas, nga matod pa, usa ka treason.

Makalingaw ning impeachment complaint batok sa duha ka dagko nga opisya­les sa atong kagamhanan alang sa mga tsismoso apan makalagot alang sa mga dumadapig ug loyalista ni Presidente Duterte ug ingon man ni Bise Presidente Robredo.

Ang impeachment complaint batok ni Presidente Duterte og sa Tagalog pa “suntok sa buwan” kon sa ato pa duol ra sa imposible tungod kay mayoriya man ang PDP-Laban, nga partido sa Presidente, sa kamara.

Sa lain nga bahin, dako og purohan nga molampos ang impeachment complaint batok ni Robredo tungod kay minoriya man ang Liberal Party, nga partido sa Bise presidente, diha sa lower house.

Apan dako pa nga kwestiyon kon moabot man sa Senado ang impeachment complaint. Nasayod ta nga bisan tuod mayoriya ang PDP-LABAN sa Senado apan ang ka­daghanan sa mga senador independente og panglantaw.

Ang nakaayo karon ni Pre­si­dente Duterte kay di na direkta nga mokomentaryo sa sama ani nga isyu. Gani, dag bolada ni Bise Presidente Robredo, miingon si Presidente Duterte nga di siya motuo nga may kalabutan ang Bise Presidente sa impeachment complaint batok kaniya.

● ● ●

MIDAKO. Ang giingon nga road rage diha sa F. Sotto st. midako kay, pung pa sa mga bata, mi enter the dragon si Cebu City Mayor Tommy Osmeña. Swerte si Nuñal sa tanan nga nangagi nga biktima sa krimen kay personal nga gitabangan ni Mayor Tommy.

Nangunay si Mayor Tommy og gukod sa suspek nga gituhoan nga si David Lim, Jr. Gani, iyang gipost sa iyang Facebook ang iyang pagsearch sa balay sa amahan ni David Jr. uban ang SWAT policemen bisan way orden gikan sa korte.

Pung pa sa akong tinubdan nga nahadlok og maayo ang inahan in David Jr. ug iyang mga gagmay pa nga mga anak sa pagsulod sa mga armado nga SWAT. Bisan sa kakuwang sa orden gikan sa korte nga makasulod sila sa balay ni David Sr., daghan ang miabiba sa gibuhat ni Mayor Tommy sa FB.

Unsa kahay sunod nga eksena ning maong hitabo? Mosurender kaha si David Jr?