Barrita: Mga langyaw mga ATM skimmer

Eddie O. Barrita

MGA langyaw diay ang responsible sa ATM skimming, ang kawat pinaagi sa pagkopya sa mga Automated Teller Machines (ATM) cards, labi na sa Land Bank of the Philippines. Daling nasikop sa National Bureau of Investigation (NBI) 7 niadtong Biyernes ang tulo ka mga Romanian nationals nga gikata­hapang mga ATM skimmers.

Sigi tag promote para sa turismo. Kini sila di na kini mga turista, tulis ta na ni. Nianhi sila sa Sugbo aron mangawat sa deposito sa mga tawo pinaagi sa pagkopya sa mga personal identification number (PIN) sa mga ATM.

Tiaw moy naapil pa si retired Regional Trial Court Judge Meinrado Paredes, pipi­la ka mga opisyal sa pulis ug mga kawani sa gobyerno sa ilang mga biktima.

Angay nga paladman pa sa NBI 7 ang ilang imbestigasyon kon kining maong mga Romanian nationals mao ba kadtong nag-ATM skimming sa laing mga nasod apan anhi sa mga bangko dinhi sa Sugbo ug sa ubang mga dapit sa Pilipinas mi-withdraw.

Usa ka imbestigador sa kapulisan misugilon kanako nga usa sa ilang dinakpan nga Romanian national niingon nga angay pa silang pasalamatan kay nakatabang sila sa mga bangko ug sa ekonomiya sa Pilipinas.

Nganon man? Kay sa matag withdraw nila, kon ang account nga gigamit gikan sa gawas sa nasud, mo-charge man ang bangko og P200 nga ATM access fee.

Nahutdan na tingali silag kinawat nga ATM sa gawas sa nasod mao na nga ang mga Pinoy nay ilang gikawatan.

Giunsa man sa NBI 7 nga dali ra man nilang nasikop kining maong mga langyaw nga nagpaluyo niining ATM skimming?

Si NBI 7 Special Investigator Florante Gaoiran niingon nga ilang na-trace ang maong mga langyaw pinaagi sa closed-circuit television (CCTV) footage nga gihatag sa Landbank.

Nakuha sa CCTV sa bangko ang sakyanan nga Mustang sa mga langyaw ug pinaagi sa usa ka search warrant nga giluwatan ni Regional Trial Court Judge Generosa Labra, gisulod sa mga ahente sa NBI 7 ang usa ka high-end condominium sa Barangay Lahug, siyudad sa Sugbo.