Sugilanon: April love

Lamberto G. Ceballos
Cawayan, Dalaguete, Cebu

DIHAY mihunong nga Ceres Bus tungod sa ‘gate’ sa kongkretong paril sa balay nilang Nelson. Duha ka andana ang bunggalo nga balay. Diha siya sa terasa sa ubos nga nag-atubang sa karsada, nagbasa og ‘romance novel’ nga nag-uloha’g Oranges in Snow. Mihunong siya pagbasa ug milantaw sa karsada. Nakita niya ang duha ka babaye nga nanaog sa bus ug miduol sa ‘gate.’

“Kuya, ablihi mi!” sangpit ni Carmen, manghod nga dalaga ni Nelson nga nagbiking og traveling bag. Ang kuyog niyang babaye nagbitbit pod og traveling bag.

Dali nga misanong si Nelson. Gipunit niya ang yawe sa kandado sa ‘gate’ nga diha sa lamesa diin siya nagbasa ug dali nga mipaingon sa nahimutangan sa duha ka bag-ong nangabot.

“Kuya, siya si Ellen, my office mate,” paila ni Carmen sa iyang kuyog ngadto kang Nelson. “Ellen, my handsome brother, Nelson.” Mingisi si Carmen nga matiawon.

“Nice to know you, Ellen!” ni Nelson nga mitunol sa iyang tuong kamot nga gidawat ni Ellen nga nagpahiyom. May milabtik sulod sa iyang dughan nga mitutok sa panagway ni Ellen.

“Nice to meet you, too, Nelson,” ni Ellen nga nagpahiyom. “Pirme kang gihisgutan ni Carmen sa among opisina nga iyang buotang maguwang nga very eligible bachelor.”

Nag-bakasyon si Carmen sa iyang trabaho isip accountant sa usa ka kompaniya didto sa dakbayan, sama sa naandan human sa deadline sa pag-payl sa Income tax return sa BIR sa Abril 15 matag tuig. Apan ning higayuna may kuyog kini nga usa ka maanyag nga dalaga nga nakadani sa pagtagad ni Nelson nga ulitawo pa sa edad nga 33. Maestro siya sa barangay high school sa sa ilang balangay sa Nayawak. Bakasyon karon sa eskuylahan. Maguwang siya ni Carmen og upat ka tuig. Sa iyang banabana talirungan niini si Ellen sa edad nga 29.

Nianang pagka ugma sa buntag sa sugyot ni Carmen nangadto sila sa Obong Spring aron mangaligo. Si Nelson maoy nag-drayeb sa multicab nga serbis sa iyang ginikanan nga may grocery store sa merkado sa lungsod. Gihatod una niya si Papa ug si Mama niya sa merkado, usa sila mopadayon sa Obong Spring. Daghan nang nangaligo paghiabot nila didto. Naghukas dayon sila si Carmen ug Ellen sa ilang gisul-ob nga shorts ug T-shirt.

Nagsul-ob diay sila daan og bikini. Misiga ang mga mata ni Nelson daw ang 50 bohiyas nga bombilya nga mitutok sa seksing bayhon ni Ellen nga nag-biki ni lang sama ni Carmen. ‘Mao na ni siya ang akong pangasaw-on! She’s the one I’m looking for!’ tuaw ni Nelson sa hilom.

Sa misunod nga mga adlaw nanuroy sila sa mga tourist spot sa habagatang bahin sa Sugbo. Sulod ning panahuna nagkasuod ang pagbati nilang Nelson ug Ellen. Namatikdan kini ni Carmen.

“Don’t get angry, ha, Len,” matod ni Nelson usa ka gabii didto sa terasa nga sila dang duha. “Sa una kong pagkakita nimo mipitik baya dayon akong kasingkasing.”

“Unsay gipitik?” nagngisi si Ellen nga mitan-aw sa nawong ni Nelson.

“Gugma!” pintok nga tubag ni Nelson. “May uyab na ka, Len?”

“Kaniadto, apan duha na ka tuig ming nagbuwag. Tsikboy siya,” ni Ellen.

“So, duna pa diay koy purohan nga makasud sa imong dughan,” seryuso si Nelson.

“Di tingali ka masud kay dako kaayo ka,” ni Ellen nga mibahikhik. “Bitaw, tan-awon lang nato. Para nako, okey baya ka. Igsuon god ka sa akong best friend,” ni Ellen.

Sa adlaw nga  mao untay ibalik sa siyudad nilang Carmen ug Ellen, mibunok ang unang ulan sa Abril nga niana pang kaadlawon nagsugod pagbunok. Kusog ang ulan, mao nga gipaliban nila’g laing adlaw ang ilang pagbiyahe.

USA ka sayong buntag nagsakay na sa Ceres Bus padung sa siyudad sa Sugbo ang duha ka dalaga, apan kuyog nila si Nelson nga nakahukom nga adto sa dakbayan padayuna ang paghalad sa iyang gugma kang Ellen. Milagingling karon sa panumdoman ni Nelson ang laray sa kanta ni Pat Boone nga April Love nga nagkanayon, “But April love can slip/ right through your fingers./ And if she’s the one,/ don’t let her run away!” (Katapusan)