Mga magazine nag-digital na

AC Martin

KARON pa ko nga wala na diay baligyang StarStudio Magazine. Ang ilang last issue niadto pang Enero 4, 2018.

Ang StarStudio ang usa sa pinakakusog nga celebrity lifestyle magazine niadto sa ABS-CBN.

Mga 10 or 15 years ago, kahinumdom ko anha pa ko magkuhaan og magazine sa kanhi newsstand ni Mrs. Rose Lim diha ubos sa Ultra Vistarama.

Chika sa atong insider bugtong ang Metro Magazine na lang kunoy nahibiling publication karon sa ABS-CBN kay ang tanan nilang publication gibalhin na sa digital.

Bisan asa kuno ron apektado tungod sa social media ug naa ta sa gitawag nila karong transition period.
 
Summit Media

Sa miaging semana, ni-goodbye na sad ang Summit Media sa ilang print magazines human nakumpleto nila ang ilang “digital transformation.”

Ang Summit Media ang usa sa pinakadako nga magazine publishers sa nasud, nga maoy nagpaluyo sa mga sikat nga publication, sama sa Yes Magazine!, Cosmopolitan Philippines, Preview, Top Gear, FHM ug uban pa.

Kini tanan natong gipanganlan wagtangon na sa print kay ibalhin na sa digital.

“Moving forward and into the future… in a digital era where opportunities abound,” tipik sa ilang official statement.
 
Instant celebrity

Okay, kusog ang social media. Liboan ug minilyon ang likes sa mga online celebrity.

Pero wa man lagi manimaho sa takilya ang pelikulang “Magbuwag ta Kay” nga gibituonan sa mga social media influencers sa Cebu?

Kon nakabantay mo, daghang instant celebrity karon sa social media. Pero instant sad makalimtan.

Lahi pa gihapon ang traditional nga moagi ka sa reality search o singing competition kay mas molungtad.

Lahi pa gihapon kanang duna kay hard copy nga basahon. Sama sa mga klasikong awit nga nagpabiling buhing saksi sa daghang kagahapon.

Kon digital na gyud tanan, mao tingali nang panahona nga ang traffic tua na sa kawanangan kay  makalupad na ang tawo. Definitely, not in our lifetime.
 
Reunion

Nag-reunion niadtong Dominggo sa beach party ang mga kanhi kawani sa Sun.Star Cebu nga ang uban atong nakauban niadto pang 1987 sa karaang building didto sa Sanciangko.

“Young Once Get Together” ang tema sa reunion ug bilib ko kay daghan nila ang wa gyud matiguwang sama nilang Bobby dela Pieza ug Iglee Lladas. Sa sunod pagpahibawo sad mo uy aron makaapil mi. Haha…